ಇಂದು (ಜೂನ್ 25) ಮಧ್ಯಾಹ್ನ 12 ಗಂಟೆಗೆ ಭಾರತೀಯ ಗಗನಯಾತ್ರಿ Shubanshu Shukla ಅವರು ಅಂತರಿಕ್ಷಕ್ಕೆ ಪಯಣ ಮಾಡಲಿದ್ದಾರೆ. ನಾಸಾ, ಆಕ್ಸಿಯಮ್ ಸ್ಪೇಸ್ ಮತ್ತು ಸ್ಪೇಸ್ಎಕ್ಸ್ ಸಂಸ್ಥೆಗಳು ಜಂಟಿಯಾಗಿ ಹಮ್ಮಿಕೊಂಡಿರುವ ಈ “ಆಕ್ಸಿಯಮ್ ಮಿಷನ್ 4” ಮೂಲಕ ಅವರು ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ (ISS) ತಲುಪಲಿದ್ದಾರೆ.
ಅಮೆರಿಕದ ಫ್ಲೋರಿಡಾದ ನಾಸಾ ಬಾಹ್ಯಾಕಾಶ ಕೇಂದ್ರದ ಲಾಂಚ್ ಪ್ಯಾಡ್ 39Aದಿಂದ ಫಾಲ್ಕನ್ 9 ರಾಕೆಟ್ ಮೂಲಕ ಉಡ್ಡಯನ ನಡೆಯಲಿದೆ. ಈ ರಾಕೆಟ್‌ನಲ್ಲಿ ಶುಭಾಂಶು ಶುಕ್ಲಾ ಸೇರಿದಂತೆ ನಾಲ್ವರು ಗಗನಯಾತ್ರಿಗಳು ಸ್ಪೇಸ್ಎಕ್ಸ್ ಡ್ರ್ಯಾಗನ್ ನೌಕೆಯಲ್ಲಿ ಪ್ರಯಾಣಿಸುರುವರು. ಈ ನೌಕೆ ಜೂನ್ 26ರ ಬೆಳಗ್ಗೆ 7 ಗಂಟೆಗೆ (ಭಾರತೀಯ ಸಮಯದಂತೆ ಸಂಜೆ 4.30ಕ್ಕೆ) ISSಗೆ ಡಾಕಿಂಗ್ ಮಾಡಲಿದೆ.
ISSನಲ್ಲಿ ಇತ್ತೀಚೆಗೆ ನಡೆಸಿದ ದುರಸ್ತಿ ಕಾರ್ಯಗಳು ಯಶಸ್ವಿಯಾಗಿ ಪೂರ್ಣಗೊಂಡ ಹಿನ್ನೆಲೆಯಲ್ಲಿ ಈ ಮಿಷನ್‌ಗೆ ಮುಕ್ತ ನೆಲೆ ದೊರೆತಿದೆ. ನಾಸಾ ಮತ್ತು ರೋಸ್ಕೋಸ್ಮೋಸ್ (ರಷ್ಯಾ ಬಾಹ್ಯಾಕಾಶ ಸಂಸ್ಥೆ) ತಾಂತ್ರಿಕ ಸಹಕಾರದೊಂದಿಗೆ ಈ ಯೋಜನೆ ಸಾಧ್ಯವಾಗಿದೆ.
ಗಗನಯಾತ್ರಿಗಳ ವಿವರ
- ಶುಭಾಂಶು ಶುಕ್ಲಾ – ಇಸ್ರೋ ಗಗನಯಾತ್ರಿ ಹಾಗೂ ಪೈಲಟ್
- ಸ್ಲಾವೋಸ್ಜ್ ಉಜ್ನಾನ್ಸ್ಕಿ-ವಿಸ್ನಿಯೆವ್ಸ್ಕಿ – ಪೋಲೆಂಡ್‌ನ ESA ಯೋಜನೆಯ ಅಂತರಿಕ್ಷ ಪ್ರಯಾಣಿಕ
- ಟಿಬೋರ್ ಕಾಪು – ಹಂಗೇರಿಯ HUNOR ಯೋಜನೆಯ ಗಗನಯಾತ್ರಿ
ಈ ಮಿಷನ್‌ನ ಉಡಾವಣೆ ಹಾಗೂ ಡಾಕಿಂಗ್‌ನ ನೇರಪ್ರಸಾರವನ್ನು NASA+ ಪ್ಲಾಟ್‌ಫಾರ್ಮ್‌ನಲ್ಲಿ ವೀಕ್ಷಿಸಬಹುದು. ನಾಸಾ ಈ ಕಾರ್ಯಕ್ರಮದ ಸಂಪೂರ್ಣ ಹೊಣೆ ಹೊತ್ತಿದೆ.
ಈ ಮಿಷನ್‌ಗಾಗಿ ನಿರ್ದೇಶನ ನೀಡುತ್ತಿರುವವರು ನಾಸಾದ ಮಾಜಿ ಗಗನಯಾತ್ರಿ ಮತ್ತು ಈಗ ಆಕ್ಸಿಯಮ್ ಸ್ಪೇಸ್ ಸಂಸ್ಥೆಯ ನಿರ್ದೇಶಕಿ ಪೆಗ್ಗಿ ವಿಟ್ಸನ್. ಅವರು ಈ ಯೋಜನೆಗೆ ತಾಂತ್ರಿಕ ಮಾರ್ಗದರ್ಶನ ನೀಡುತ್ತಿದ್ದಾರೆ.
ಇದು ಭಾರತೀಯ ಬಾಹ್ಯಾಕಾಶ ಕ್ಷೇತ್ರಕ್ಕೆ ಹೆಮ್ಮೆಯ ಕ್ಷಣವಾಗಿದ್ದು, ನಿಮ್ಮ ಟಿವಿ ಅಥವಾ ಮೊಬೈಲ್‌ನಲ್ಲಿ NASA+ ಮೂಲಕ ಈ ಐತಿಹಾಸಿಕ ಪಯಣವನ್ನು ವೀಕ್ಷಿಸಬಹುದು.
