Washington: ಉಕ್ರೇನ್ ನಲ್ಲಿ ಪ್ರಸ್ತಾವಿತ 30 ದಿನಗಳ ಕದನ ವಿರಾಮಕ್ಕೆ ಅಮೆರಿಕ, ರಷ್ಯಾದ ಅನುಮೋದನೆ ಕೋರುತ್ತಿರುವಾಗ, ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ (Trump-Putin) ನಿರ್ಣಾಯಕ ಫೋನ್ ಸಂಭಾಷಣೆ ನಡೆಸಿದ್ದಾರೆ ಎಂದು ಶ್ವೇತಭವನ ದೃಢಪಡಿಸಿದೆ.
ರಷ್ಯಾದ ಪಡೆಗಳು ಉಕ್ರೇನ್ ಮೇಲೆ ದಾಳಿ ಮುಂದುವರಿಸುತ್ತಿರುವಾಗ, ಪುಟಿನ್ ಕೇವಲ ಶಾಂತಿ ಸ್ಥಾಪನೆಯ ಬಗ್ಗೆ ಹೇಳಿಕೆ ನೀಡುತ್ತಿದ್ದಾರೆ ಎಂದು ಉಕ್ರೇನ್ ಅಧ್ಯಕ್ಷ ಝೆಲೆನ್ಸ್ಕಿ ಆರೋಪಿಸಿದರು.
ಶ್ವೇತಭವನವು ಈ ಮಾತುಕತೆಗೆ ಮುನ್ನ ಆಶಾವಾದ ವ್ಯಕ್ತಪಡಿಸಿದ್ದು, ಟ್ರಂಪ್ ಯುದ್ಧ ಪರಿಹಾರಕ್ಕೆ ಬದ್ಧರಾಗಿರುವುದನ್ನು ಒತ್ತಿಹೇಳಿತು. ಟ್ರಂಪ್ ಸುದ್ದಿಗಾರರಿಗೆ, “ರಷ್ಯಾ ಹಾಗೂ ಉಕ್ರೇನಿನ ಸ್ಥಿತಿ ಚಿಂತಾಜನಕ. ನಾವು ಶಾಂತಿ ಒಪ್ಪಂದ ಮತ್ತು ಕದನ ವಿರಾಮ ಸಾಧ್ಯವೋ ನೋಡಲಿದ್ದೇವೆ” ಎಂದಿದ್ದಾರೆ.
ಆದರೆ, ರಷ್ಯಾದ ನಿರಂತರ ದಾಳಿಗಳ ನಡುವೆಯೂ, ಉಕ್ರೇನ್ ಅಧ್ಯಕ್ಷ ಝೆಲೆನ್ಸ್ಕಿ ಪುಟಿನ್ ಅವರ ಉದ್ದೇಶದ ಬಗ್ಗೆ ಅನುಮಾನ ವ್ಯಕ್ತಪಡಿಸಿದ್ದಾರೆ. ಇಂದು ನಡೆದ ಫೋನ್ ಸಂಭಾಷಣೆಯ ಪರಿಣಾಮ ಇನ್ನೂ ಸ್ಪಷ್ಟವಾಗಿಲ್ಲ. ಆದರೆ, ರಾಜತಾಂತ್ರಿಕ ಪರಿಹಾರ ಹುಡುಕುವ ಬದ್ಧತೆಯನ್ನು ಶ್ವೇತಭವನ ಪುನರಾವರ್ತಿಸಿದೆ.
