ಹರಿಯಾಣ: NCR (ರಾಷ್ಟ್ರೀಯ ರಾಜಧಾನಿ ಪ್ರದೇಶ)ನಲ್ಲಿ ವಾಯು ಮಾಲಿನ್ಯವನ್ನು ಕಡಿಮೆ ಮಾಡುವುದು ಗುರಿಯಾಗಿಸಿಕೊಂಡಿರುವ ಹರಿಯಾಣ ಸರ್ಕಾರ, (Haryana government) ಹಳೆಯ ಮಾಲಿನ್ಯಕಾರಕ ವಾಹನಗಳಿಗೆ ಇಂಧನ ನೀಡುವುದನ್ನು ನಿಷೇಧಿಸಿ ಮಹತ್ವದ ಯೋಜನೆ ಘೋಷಿಸಿದೆ.
ಗುರುಗ್ರಾಮ್, ಫರೀದಾಬಾದ್ ಮತ್ತು ಸೋನಿಪತ್‌ನ ಫ್ಯೂಯಲ್ ಬಂಕ್‌ಗಳು 2024ರ ನವೆಂಬರ್ 1ರಿಂದ ಜೀವಿತಾವಧಿ ಮೀರಿದ ವಾಹನಗಳಿಗೆ (ELV) ಪೆಟ್ರೋಲ್ ಅಥವಾ ಡೀಸೆಲ್ ನೀಡುವುದಿಲ್ಲ. ಈ ನಿಷೇಧ 2025ರ ಏಪ್ರಿಲ್ 1ರಿಂದ NCRದ ಇತರ ಜಿಲ್ಲೆಗಳಿಗೂ ವಿಸ್ತರಿಸಲಾಗುತ್ತದೆ.
ಈ ವಾಹನಗಳನ್ನು ಪತ್ತೆಹಚ್ಚಲು ಎಲ್ಲಾ ಬಂಕ್‌ಗಳಲ್ಲಿ 2025ರ ಅಕ್ಟೋಬರ್ 31ರೊಳಗೆ ಆಟೋಮೆಟಿಕ್ ನಂಬರ್ ಪ್ಲೇಟ್ ರೆಕಗ್ನಿಷನ್ (ANPR) ಕ್ಯಾಮೆರಾಗಳನ್ನು ಅಳವಡಿಸಲಾಗುತ್ತದೆ. NCRದ ಉಳಿದ ಭಾಗಗಳಲ್ಲಿ ಈ ವ್ಯವಸ್ಥೆ 2026ರ ಮಾರ್ಚ್ 31ರೊಳಗೆ ಜಾರಿಗೆ ಬರುತ್ತದೆ.
ELV ವಾಹನ ಎಂದರೆ ಏನು?: ಆಟೋಮೆಟಿಕ್ ಫಿಟ್ನೆಸ್ ಪರೀಕ್ಷೆಯಲ್ಲಿ ಅನರ್ಹವಾದ ಅಥವಾ ನೋಂದಣಿ ರದ್ದಾದ ವಾಹನಗಳು ELV ಆಗಿ ಪರಿಗಣಿಸಲಾಗುತ್ತವೆ. ಇವುಗಳನ್ನು ವಶಪಡಿಸಿಕೊಳ್ಳಲು ಮತ್ತು ಸ್ಕ್ರ್ಯಾಪ್ ಮಾಡಲು ಕ್ಯಾಮೆರಾ ಮತ್ತು ಕಂಟ್ರೋಲ್ ಸೆಂಟರ್ ಉಪಯೋಗಿಸಲಾಗುತ್ತದೆ.
ಹಸಿರು ಸಾರಿಗೆ ಕಡ್ಡಾಯ: ಹರಿಯಾಣ ಸರ್ಕಾರವು ಮುಂದೆ ಹೊಸ ಆಟೋರಿಕ್ಷಾಗಳಿಗೆ ಮಾತ್ರ CNG ಅಥವಾ ಎಲೆಕ್ಟ್ರಿಕ್ ಆಯ್ಕೆಯನ್ನು ಅನುಮತಿಸುತ್ತದೆ. ದೆಹಲಿಗೆ ಪ್ರವೇಶಿಸಲು 2025ರ ನವೆಂಬರ್ 1ರಿಂದ BS6 ನಿಯಮ ಪಾಲನೆ ಮಾಡುವ ಲಘು, ಮಧ್ಯಮ ಮತ್ತು ಭಾರೀ ವಾಹನಗಳಿಗೂ ಮಾತ್ರ ಅನುಮತಿ ಸಿಗುತ್ತದೆ.
2026ರ ಜನವರಿಯಿಂದ ಹೊಸ ಪೆಟ್ರೋಲ್/ಡೀಸೆಲ್ ದ್ವಿಚಕ್ರ, ನಾಲ್ಕುಚಕ್ರ ಅಥವಾ ಬೃಹತ್ ವಾಹನಗಳನ್ನು ಫ್ಲೀಟ್ನಲ್ಲಿ ಸೇರಿಸುವಂತಿಲ್ಲ. ಇದೇ ವರ್ಷ ನವೆಂಬರ್ 1ರಿಂದ ದೆಹಲಿಗೆ ಪ್ರವೇಶಿಸುವ ಎಲ್ಲಾ ಬಸ್‌ಗಳು EV, CNG ಅಥವಾ BS6 ಮಾನದಂಡಕ್ಕೆ ಅನುಗುಣವಾಗಿರಬೇಕು.
ವಾಯು ಮಾಲಿನ್ಯ ತಡೆಯುವ ನಿಟ್ಟಿನಲ್ಲಿ ಹರಿಯಾಣ ಸರ್ಕಾರದ ಈ ನಿರ್ಧಾರ NCR ಪ್ರದೇಶದಲ್ಲಿ ಗಣನೀಯ ಪರಿಣಾಮ ಬೀರುವ ನಿರೀಕ್ಷೆಯಿದೆ. ಹಳೆಯ ಮಾಲಿನ್ಯಕಾರಕ ವಾಹನಗಳ ಕಾಲ ಮುಕ್ತಾಯವಾಗುತ್ತಿದೆ!
