Bengaluru: ಹೈಕೋರ್ಟ್ (High Court) ಅಭಿಪ್ರಾಯಪಟ್ಟಂತೆ, ಅಪರಾಧಿಗಳನ್ನು ಕೇವಲ ಸಮಾಜದಿಂದ ದೂರವಿಟ್ಟರೆ ಅವರು ಸುಧಾರಿಸುವ ಅವಕಾಶ ಕಡಿಮೆಯಾಗುತ್ತದೆ. ಶಿಕ್ಷೆಯ ಮುಖ್ಯ ಉದ್ದೇಶವು ಅಪರಾಧಿಯನ್ನು ತಿದ್ದುವುದು. ಅದಕ್ಕಾಗಿ ಪೆರೋಲ್‌ ನೀಡುವ ಪ್ರಕ್ರಿಯೆಯಲ್ಲಿ ಅಧಿಕಾರಿಗಳು ವಿವೇಕಬುದ್ಧಿಯಿಂದ ನಿರ್ಧಾರ ಕೈಗೊಳ್ಳಬೇಕು ಎಂದು ನ್ಯಾಯಾಲಯ ತಿಳಿಸಿದೆ.
ಬೀದರ್ ಜಿಲ್ಲೆಯ ಚೋಟಿ ಬೀ ಎಂಬ ಮಹಿಳೆಯ ಅರ್ಜಿಯನ್ನು ವಿಚಾರಣೆ ಮಾಡಿದ ಹೈಕೋರ್ಟ್, ಅವರ ಮಗ ಸದ್ದಾಂ (ಕೊಲೆ ಪ್ರಕರಣದ ಶಿಕ್ಷಿತ)ಗೆ 60 ದಿನಗಳ ಪೆರೋಲ್‌ ನೀಡಲು ಆದೇಶಿಸಿದೆ. ಪೆರೋಲ್‌ ಅವಧಿಯಲ್ಲಿ ಸದ್ದಾಂ ವಾರಕ್ಕೆ ಒಂದು ಬಾರಿ ಸ್ಥಳೀಯ ಪೊಲೀಸ್ ಠಾಣೆಗೆ ಹಾಜರಾಗಿ ಸಹಿ ಹಾಕಬೇಕು. ಅವಧಿ ಮುಗಿದ ನಂತರ ಜೈಲಿಗೆ ಹಿಂತಿರುಗುವುದು ಕಡ್ಡಾಯ.
ಹೈಕೋರ್ಟ್ ದಾಖಲೆಗಳನ್ನು ಪರಿಶೀಲಿಸಿ, ಜೈಲು ಅಧಿಕಾರಿಗಳು ವಾಸ್ತವಾಂಶಗಳನ್ನು ಪರಿಗಣಿಸದೆ ಕೇವಲ ಒಂದೇ ರೀತಿಯ ವರದಿಗಳನ್ನು ಸಲ್ಲಿಸುತ್ತಿದ್ದಾರೆ ಎಂದು ತೀವ್ರ ಬೇಸರ ವ್ಯಕ್ತಪಡಿಸಿದೆ. ಪ್ರತಿಯೊಂದು ಪ್ರಕರಣವನ್ನು ಪ್ರತ್ಯೇಕವಾಗಿ ಪರಿಶೀಲಿಸಿ ಸೂಕ್ತ ನಿರ್ಧಾರ ತೆಗೆದುಕೊಳ್ಳಬೇಕು ಎಂದು ಸೂಚಿಸಿದೆ.
ಪೆರೋಲ್‌ ಎಂಬುದು ಸಂವಿಧಾನದ ಕಲಂ 21ರಡಿ ಕೈದಿಗಳಿಗೆ ಸಿಗುವ ಹಕ್ಕಾಗಿದೆ. ಅದನ್ನು ನಿರಾಕರಿಸುವಾಗ ಪ್ರತಿಯೊಂದು ಪ್ರಕರಣದ ಹಿನ್ನೆಲೆ ಪರಿಶೀಲಿಸಬೇಕು ಎಂದು ಹೈಕೋರ್ಟ್ ತಿಳಿಸಿದೆ.
ಪ್ರಕರಣದ ಹಿನ್ನೆಲೆ: ಸದ್ದಾಂ 2017ರಲ್ಲಿ ಕೊಲೆ ಪ್ರಕರಣದಲ್ಲಿ ಶಿಕ್ಷೆಗೆ ಗುರಿಯಾಗಿದ್ದು, ಕಳೆದ 8 ವರ್ಷಗಳಿಂದ ಜೈಲಿನಲ್ಲಿ ಇದ್ದಾನೆ. ತೀವ್ರ ಅನಾರೋಗ್ಯದಿಂದ ಬಳಲುತ್ತಿರುವ ತಾಯಿ ಚೋಟಿ ಬೀ, ಮಗನನ್ನು 90 ದಿನಗಳ ಪೆರೋಲ್‌ನಲ್ಲಿ ಬಿಡುಗಡೆ ಮಾಡಲು ಮನವಿ ಸಲ್ಲಿಸಿದ್ದರು. ಜೈಲು ಅಧಿಕಾರಿಗಳು ಒಪ್ಪಿಕೊಂಡರೂ, ಪೊಲೀಸರು ಸಲ್ಲಿಸಿದ ವರದಿಯ ಆಧಾರದಲ್ಲಿ ಬಿಡುಗಡೆ ನಿರಾಕರಿಸಲಾಯಿತು. ಇದನ್ನು ಪ್ರಶ್ನಿಸಿ ಅವರು ಹೈಕೋರ್ಟ್‌ಗೆ ದೂರು ನೀಡಿದ್ದರು.
