ಗಾಜಾ (Gaza) ನಗರದಲ್ಲಿ ಇಸ್ರೇಲ್ ನಡೆಸಿದ ವಾಯು ಮತ್ತು ಪದಾತಿದಳ ದಾಳಿಯಲ್ಲಿ ಒಂದೇ ದಿನ 91 ಮಂದಿ ಸಾವಿಗೀಡಾಗಿದ್ದಾರೆ. ಮೃತರಲ್ಲಿ ಖ್ಯಾತ ಕುಟುಂಬದವರು ಮತ್ತು ಗಾಜಾ ತೊರೆಯಲು ಹೊರಟಿದ್ದ ನಾಗರಿಕರೂ ಸೇರಿದ್ದಾರೆ. ವಸತಿ ಮನೆಗಳು, ಆಶ್ರಯ ಕೇಂದ್ರಗಳು, ನಿರಾಶ್ರಿತರ ಶಿಬಿರಗಳು ಹಾಗೂ ನಾಗರಿಕರ ಟ್ರಕ್‌ಗಳನ್ನೂ ಗುರಿಯಾಗಿಸಿ ದಾಳಿ ನಡೆಸಲಾಗಿದೆ.
ಗಾಜಾದ ಅತಿದೊಡ್ಡ ಅಲ್-ಶಿಫಾ ಆಸ್ಪತ್ರೆಯ ನಿರ್ದೇಶಕ ಡಾ. ಮೊಹಮ್ಮದ್ ಅಬು ಸಲ್ಮಿಯಾ ಅವರ ಕುಟುಂಬದವರೂ ಈ ದಾಳಿಯಲ್ಲಿ ಬಲಿಯಾಗಿದ್ದಾರೆ. ಅವರ ಸಹೋದರ, ಅತ್ತಿಗೆ ಮತ್ತು ಮಕ್ಕಳು ವಾಸಿಸುತ್ತಿದ್ದ ಮನೆ ಬಾಂಬ್ ಸ್ಫೋಟದಿಂದ ನಾಶವಾಯಿತು.
ಹಮಾಸ್ ಈ ದಾಳಿಯನ್ನು ಖಂಡಿಸಿ, “ಗಾಯಾಳುಗಳಿಗೆ ಚಿಕಿತ್ಸೆ ನೀಡುತ್ತಿದ್ದ ವೈದ್ಯರನ್ನು ನಗರ ಬಿಟ್ಟು ಓಡಿಸಲು ನಡೆಸಿದ ರಕ್ತಸಿಕ್ತ ದಾಳಿ” ಎಂದು ಆರೋಪಿಸಿದೆ.
ಸುರಕ್ಷಿತ ಪ್ರದೇಶಗಳಿಗೆ ತೆರಳುತ್ತಿದ್ದ ನಾಗರಿಕರ ಟ್ರಕ್ ಮೇಲೂ ಬಾಂಬ್ ದಾಳಿ ನಡೆದಿದ್ದು, ನಾಲ್ವರು ಸಾವಿಗೀಡಾಗಿದ್ದಾರೆ. ನಿರಂತರ ದಾಳಿಯಿಂದ ಜನರು ಭಯಭೀತರಾಗಿ ಪರಾರಿಯಾಗುತ್ತಿದ್ದಾರೆ.
ಇಸ್ರೇಲ್ ಪಡೆಗಳು ಸ್ಫೋಟಕ ತುಂಬಿದ ರೋಬೋಟ್‌ಗಳನ್ನು ಬಳಸಿ ಇಡೀ ಪ್ರದೇಶಗಳನ್ನು ಧ್ವಂಸಗೊಳಿಸುತ್ತಿವೆ. ಸ್ಫೋಟದಿಂದ ಭೂಕಂಪದ ಅನುಭವವಾಗುತ್ತಿದೆ ಎಂದು ನಿವಾಸಿಗಳು ಹೇಳಿದ್ದಾರೆ. ವೈದ್ಯಕೀಯ ಮತ್ತು ರಕ್ಷಣಾ ಸಿಬ್ಬಂದಿಗೆ ಗಾಯಾಳುಗಳನ್ನು ತಲುಪುವುದು ಕಷ್ಟವಾಗಿದೆ.
ಆಗಸ್ಟ್‌ನಿಂದ ನಡೆದ ದಾಳಿಗಳಿಂದಾಗಿ ಗಾಜಾ ನಗರದ 10 ಲಕ್ಷ ಜನರಲ್ಲಿ 4,50,000 ಜನರು ಸ್ಥಳಾಂತರಗೊಂಡಿದ್ದಾರೆ. ಕಳೆದ ಎರಡು ವಾರಗಳಲ್ಲಿ 20ಕ್ಕೂ ಹೆಚ್ಚು ಬಹುಮಹಡಿ ಕಟ್ಟಡಗಳನ್ನು ನೆಲಸಮಗೊಳಿಸಲಾಗಿದೆ. ಅನೇಕ ನಿರಾಶ್ರಿತರು ರಸ್ತೆ ಬದಿಯಲ್ಲಿ ಟೆಂಟ್‌ಗಳಲ್ಲಿ ವಾಸಿಸುತ್ತಿದ್ದು, ನೀರು, ವಿದ್ಯುತ್, ಮೂಲಸೌಕರ್ಯಗಳ ಕೊರತೆ ಎದುರಿಸುತ್ತಿದ್ದಾರೆ.
ಅಲ್ ಮವಾಸಿ ಪ್ರದೇಶಕ್ಕೆ ಸ್ಥಳಾಂತರಗೊಂಡ ಜನರು ಟೆಂಟ್ ಹಾಕಲು ಜಾಗ ಮತ್ತು ಸಾಮಗ್ರಿಗಳಿಲ್ಲದೆ ಪರದಾಡುತ್ತಿದ್ದಾರೆ. ಪರಿಸ್ಥಿತಿ ಹೀನಾಯವಾಗಿದ್ದು, ಸಮುದ್ರದ ಬಳಿಯ ಮರಳು ಪ್ರದೇಶಗಳಲ್ಲಿ ತಾತ್ಕಾಲಿಕ ಆಶ್ರಯ ಕಂಡುಕೊಳ್ಳುತ್ತಿದ್ದಾರೆ.
ಹಮಾಸ್ ಪ್ರಕಾರ ಗಾಜಾದಲ್ಲಿ ಇನ್ನೂ 48 ಒತ್ತೆಯಾಳುಗಳು ಇರುವರು. ಇಸ್ರೇಲ್‌ನ ನಿರಂತರ ದಾಳಿಯಿಂದ ಅವರ ಜೀವಕ್ಕೂ ಅಪಾಯವಿದೆ. ಹಮಾಸ್ ಪಡೆಗಳು ಒತ್ತೆಯಾಳುಗಳ ಚಿತ್ರವನ್ನು ಬಿಡುಗಡೆ ಮಾಡಿ ಅದನ್ನು “ವಿದಾಯ ಚಿತ್ರ” ಎಂದು ಕರೆದಿವೆ.
ಇಸ್ರೇಲ್‌ನ ಟೆಲ್ ಅವಿವ್ ನಗರದಲ್ಲಿ ಸಾವಿರಾರು ಜನರು ಯುದ್ಧ ನಿಲ್ಲಿಸಲು ಮತ್ತು ಒತ್ತೆಯಾಳುಗಳ ಬಿಡುಗಡೆಗಾಗಿ ಹಮಾಸ್ ಜೊತೆ ಒಪ್ಪಂದ ಮಾಡಲು ಪ್ರಧಾನಿ ನೆತನ್ಯಾಹು ವಿರುದ್ಧ ಪ್ರತಿಭಟನೆ ನಡೆಸಿದರು. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸಹ ಮಧ್ಯಸ್ಥಿಕೆ ವಹಿಸಲು ಒತ್ತಾಯಿಸಿದರು.
