ತಮಿಳು ಚಿತ್ರರಂಗದ ಪ್ರಸಿದ್ಧ ನಟ ವಿಶಾಲ್ (Actor Vishal) ಅವರ ಆರೋಗ್ಯ ಹದಗೆಟ್ಟಿದ್ದು, ಇದೇ ಮೇ 11ರಂದು ನಡೆದ ಕಾರ್ಯಕ್ರಮವೊಂದರಲ್ಲಿ ಅವರು ವೇದಿಕೆಯಲ್ಲಿಯೇ ಕುಸಿದು ಬಿದ್ದರು. ಈ ದೃಶ್ಯಗಳು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಅಭಿಮಾನಿಗಳಲ್ಲಿ ಆತಂಕ ಹುಟ್ಟಿಸಿದೆ.
ತಮಿಳುನಾಡಿನ ವಿಲ್ಲುಪುರಂ ಜಿಲ್ಲೆಯ ಕೂವಾಗಮ್ನಲ್ಲಿ ನಡೆದ ‘ಮಿಸ್ ಕೂವಾಗಮ್ 2025’ ಟ್ರಾನ್ಸ್ಜೆಂಡರ್ ಸೌಂದರ್ಯ ಸ್ಪರ್ಧೆಯಲ್ಲಿ ವಿಶಾಲ್ ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದರು. ಅವರು ವೇದಿಕೆಯಲ್ಲಿ ನಿಂತು ಮಾತನಾಡುತ್ತಿರುವಾಗ ಪ್ರಜ್ಞೆ ತಪ್ಪಿದರು.
ಕಾರ್ಯಕ್ರಮದಲ್ಲಿದ್ದವರು ಗಾಬರಿಗೊಂಡರು. ತಕ್ಷಣವೇ ವಿಶಾಲ್ ಅವರಿಗೆ ಪ್ರಥಮ ಚಿಕಿತ್ಸೆ ನೀಡಲಾಯಿತು ಮತ್ತು ನಂತರ ಮಾಜಿ ಸಚಿವ ಪೊನ್ಮುಡಿ ಅವರು ಅವರನ್ನು ಆಸ್ಪತ್ರೆಗೆ ಕರೆದೊಯ್ದರು. ಚಿಕಿತ್ಸೆ ಬಳಿಕ ಅವರು ಸ್ವಲ್ಪ ಚೇತರಿಸಿಕೊಂಡಿದ್ದಾರೆ.
ಇದಕ್ಕೂ ಮೊದಲು ವಿಶಾಲ್ ಅವರು ‘ಮದ ಗಜ ರಾಜ’ ಸಿನಿಮಾದ ಪ್ರಚಾರದ ವೇಳೆ ಸಹ ದುರ್ಬಲವಾಗಿ ಕಾಣಿಸಿಕೊಂಡಿದ್ದರು. ಆ ವೇಳೆ ಕೂಡ ಅವರು ನಡುಗುತ್ತಿದ್ದರು, ಮಾತನಾಡಲಾಗುತ್ತಿಲ್ಲ ಎಂದು ಅಭಿಮಾನಿಗಳು ಗಮನಿಸಿದ್ದರು.
ವೈದ್ಯರ ಪ್ರಕಾರ, ವಿಶಾಲ್ ಪ್ರಸ್ತುತ ವಿಶ್ರಾಂತಿಯಲ್ಲಿದ್ದಾರೆ. ಅವರು ಕೆಲ ದಿನ ಊಟ ಬಿಡದೇ ಸರಿಯಾಗಿ ತಿನ್ನಬೇಕು ಎಂದು ವೈದ್ಯರು ಸಲಹೆ ನೀಡಿದ್ದಾರೆ. ಅವರ ಮ್ಯಾನೇಜರ್ ಹರಿ ಹೇಳಿದ್ದಾರೆ, “ಭಾನುವಾರ ಅವರು ಏನೂ ತಿಂದಿರಲಿಲ್ಲ, ಕೇವಲ ಜ್ಯೂಸ್ ಕುಡಿದಿದ್ದರು. ಇದರಿಂದ ಅವರು ಪ್ರಜ್ಞೆ ತಪ್ಪಿದ್ದರು. ಆದರೆ ಈಗ ವಿಶಾಲ್ ಅವರು ಸುಸ್ಥಿತರಾಗಿದ್ದಾರೆ.”
ಇನ್ನು ವಿಶಾಲ್ ಅವರ ಅಭಿಮಾನಿಗಳು ಅವರ ಶೀಘ್ರ ಗುಣಮುಖತೆಯನ್ನು ಪ್ರಾರ್ಥಿಸುತ್ತಿದ್ದಾರೆ.
