Islamabad: ಪಹಲ್ಗಾಮ್‌ನಲ್ಲಿ ನಡೆದ ಭಯೋತ್ಪಾದನಾ ದಾಳಿಗೆ ಪಾಕಿಸ್ತಾನಕ್ಕೆ ಸಂಬಂಧವಿಲ್ಲವೆಂದು ಈ ಹಿಂದೆ ಹೇಳಿಕೆ ನೀಡಿದ್ದರೂ, ಪಾಕಿಸ್ತಾನದ ರಕ್ಷಣಾ ಸಚಿವರ ನಂತರ ಈಗ ಮಾಜಿ ವಿದೇಶಾಂಗ ಸಚಿವ ಬಿಲಾವಲ್ ಭುಟ್ಟೋ (Bilawal Bhutto) ಕೂಡ ಪಾಕಿಸ್ತಾನ ಹಾಗೂ ಉಗ್ರರ ನಡುವೆ ಹಳೆಯ ನಂಟು ಇದೆ ಎಂದು ಒಪ್ಪಿಕೊಂಡಿದ್ದಾರೆ.
ಅವರು ಹೇಳಿದರು: “ಪಾಕಿಸ್ತಾನಕ್ಕೆ ಭಯೋತ್ಪಾದಕ ಗುಂಪುಗಳೊಂದಿಗೆ ಇತಿಹಾಸದಿಂದಲೂ ಸಂಪರ್ಕವಿದೆ. ಇದರಿಂದ ನಮಗೆ ತೊಂದರೆ ಆಗಿದೆ. ಪಾಕಿಸ್ತಾನವು ಉಗ್ರರಿಂದಲೇ ಬಾಧಿತವಾಗಿದೆ. ಇಂತಹ ಪರಿಸ್ಥಿತಿಯಿಂದ ಹೊರಬರಲು ನಾವು ನಮ್ಮ ದೇಶದಲ್ಲಿ ಕೆಲವು ಸುಧಾರಣೆಗಳನ್ನು ಮಾಡುತ್ತಿದ್ದೇವೆ. ಹಿಂದಿನ ಕಾಲದಲ್ಲಿ ಉಗ್ರರೊಂದಿಗೆ ನಮ್ಮ ನಂಟು ಇದ್ದದ್ದು ಸತ್ಯ. ಆದರೆ ಇತ್ತೀಚಿನ ದಾಳಿಗಳಲ್ಲಿ ಪಾಕಿಸ್ತಾನ ಭಾಗಿಯಾಗಿಲ್ಲ.”
ಈ ಹೇಳಿಕೆ, ಪಾಕಿಸ್ತಾನದ ರಕ್ಷಣಾ ಸಚಿವ ಖವಾಜಾ ಆಸಿಫ್ ಅವರು “ಪಾಕಿಸ್ತಾನವು ಭಯೋತ್ಪಾದಕ ಗುಂಪುಗಳನ್ನು ಬೆಂಬಲಿಸಿ ಹಣ ಸಹ ನೀಡಿದೆಯೆಂಬ” ಮಾತುಗಳ ಬಳಿಕ ಬಂದಿದೆ. ಈ ಕುರಿತು ಸ್ಕೈ ನ್ಯೂಸ್‌ಗೆ ಸಂದರ್ಶನ ನೀಡಿದ ಬಿಲಾವಲ್ ಭುಟ್ಟೋ ಅವರು, ತಮ್ಮ ಸಹಮತವನ್ನು ತಿಳಿಸಿದ್ದಾರೆ.
ಪಾಕಿಸ್ತಾನ ಪೀಪಲ್ಸ್ ಪಾರ್ಟಿಯ ಅಧ್ಯಕ್ಷರಾದ ಬಿಲಾವಲ್ ಭುಟ್ಟೋ, ಮಿರ್ಪುರ್ ಖಾಸ್‌ನಲ್ಲಿ ನಡೆದ ಸಾರ್ವಜನಿಕ ಸಭೆಯಲ್ಲಿ ಮಾತನಾಡುತ್ತಾ, “ಪಾಕಿಸ್ತಾನ ಶಾಂತಿಯುತ ರಾಷ್ಟ್ರ. ನಮಗೆ ಯುದ್ಧ ಬೇಡ. ಆದರೆ ಯಾರಾದರೂ ನಮ್ಮ ಮೇಲಿನ ದಾಳಿಗೆ ಮುಂದಾದರೆ, ನಾವು ಪ್ರತಿಕ್ರಿಯೆ ನೀಡುವುದು ಖಚಿತ,” ಎಂದು ಎಚ್ಚರಿಸಿದರು.
ಇನ್ನೂ ಮುಂದುವರೆದು, “ನಾವು ಯುದ್ಧವನ್ನು ಪ್ರಾರಂಭಿಸಲ್ಲ, ಆದರೆ ಪ್ರಚೋದನೆ ಕಂಡರೆ, ಪಾಕಿಸ್ತಾನದ ಘರ್ಜನೆ ಪ್ರತಿದ್ವಂದ್ವಿಗಳನ್ನು ಕಿವುಡರನ್ನಾಗಿಸುತ್ತೆ.”
ಇದರಿಂದ ಪಾಕಿಸ್ತಾನದಲ್ಲಿ ಉಗ್ರರ ಸಂಬಂಧ ಸರಕಾರೀ ಮಟ್ಟದಲ್ಲೇ ಒಪ್ಪಿಕೊಳ್ಳಲಾಗುತ್ತಿದೆ ಎಂಬುದು ಸ್ಪಷ್ಟವಾಗಿದೆ.
