Hyderabad: ಎಲೆಕ್ಟ್ರಿಕ್ ವಾಹನ ತಯಾರಕ ಕಂಪನಿ ಟೆಸ್ಲಾ ಭಾರತಕ್ಕೆ ಬರಲು ಇನ್ನೂ ತಡ ಮಾಡುತ್ತಲೇ ಇದೆ. ಆದರೆ, ಚೀನಾದ ಪ್ರಖ್ಯಾತ ಇವಿ ಕಂಪನಿ ಬಿವೈಡಿ (China’s renowned EV company BYD) ವೇಗವಾಗಿ ಭಾರತ ಪ್ರವೇಶಿಸಲು ಸಜ್ಜಾಗಿದೆ. ಇಟಿವಿ ಭಾರತದ ವರದಿ ಪ್ರಕಾರ, ಹೈದರಾಬಾದ್ ಸಮೀಪ ಬಿವೈಡಿ ತನ್ನ ಉತ್ಪಾದನಾ ಘಟಕ ಸ್ಥಾಪಿಸಲು ಯೋಚಿಸುತ್ತಿದೆ. ತೆಲಂಗಾಣ ಸರ್ಕಾರ ಈ ಪ್ರಕ್ರಿಯೆಗೆ ಸಂಪೂರ್ಣ ಬೆಂಬಲ ನೀಡಲು ಸಿದ್ಧವಾಗಿದೆ.
ತೆಲಂಗಾಣ ಸರ್ಕಾರ, ಹೈದರಾಬಾದ್ ಸಮೀಪ ಮೂರು ಸ್ಥಳಗಳನ್ನು ಬಿವೈಡಿಗೆ ನೀಡಲು ಮುಂದಾಗಿದೆ. ಬಿವೈಡಿ ಅಧಿಕಾರಿಗಳು ಈ ಸ್ಥಳಗಳಲ್ಲಿ ಒಂದನ್ನು ಆಯ್ಕೆ ಮಾಡಿದ ಬಳಿಕ ಸರ್ಕಾರ ಮತ್ತು ಕಂಪನಿಯ ನಡುವೆ ಒಪ್ಪಂದ (MoU) ಸಹಿ ಸಾಧ್ಯತೆ ಇದೆ. ಇದು ಬಿವೈಡಿಯ ಭಾರತದಲ್ಲಿ ಮೊದಲ ಉತ್ಪಾದನಾ ಘಟಕವಾಗಲಿದೆ. ಇದರಿಂದ, ಹೈದರಾಬಾದ್ ಇವಿ ಉದ್ಯಮಕ್ಕೆ ಕೇಂದ್ರಬಿಂದುವಾಗುವ ಸಾಧ್ಯತೆ ಇದೆ.
ಟೆಸ್ಲಾ ಅಮೆರಿಕದ ಪ್ರಮುಖ ಇವಿ ಬ್ರ್ಯಾಂಡ್ ಆದರೂ, ಚೀನಾದಲ್ಲಿ ಬಿವೈಡಿ ಮುಂಚೂಣಿಯಲ್ಲಿದೆ. ಈ ಹಿಂದಿನ ವರ್ಷಗಳಲ್ಲಿ ಟೆಸ್ಲಾ ಚೀನಾದ ಇವಿ ಮಾರುಕಟ್ಟೆಯಲ್ಲಿ ಮುನ್ನಡೆ ಸಾಧಿಸಿದ್ದರೂ, ಈಗ ಅದು ಮೂರನೇ ಅಥವಾ ನಾಲ್ಕನೇ ಸ್ಥಾನಕ್ಕೆ ಕುಸಿಯುವ ಸ್ಥಿತಿಯಲ್ಲಿದೆ. ಇಲಾನ್ ಮಸ್ಕ್ ಅವರು ಸ್ವತಃ ಈ ಪರಿಸ್ಥಿತಿಯನ್ನು ಒಪ್ಪಿಕೊಂಡಿದ್ದಾರೆ.
ಭಾರತದ ಎಲೆಕ್ಟ್ರಿಕ್ ವಾಹನ ಮಾರುಕಟ್ಟೆ ಬೆಳೆಯುತ್ತಿರುವ ಈ ಸಂದರ್ಭದಲ್ಲಿ ಟೆಸ್ಲಾ ತಡ ಮಾಡುತ್ತಿದೆ. ಚೀನಾದ ಮಾರುಕಟ್ಟೆಯಲ್ಲಿ ಸುಸ್ತಾದ ಟೆಸ್ಲಾ ಭಾರತ ಪ್ರವೇಶಿಸಲು ಚಿಂತನೆಯಲ್ಲಿದ್ದರೂ, ನಿರ್ಧಾರ ತೆಗೆದುಕೊಳ್ಳಲು ಸಮಯ ತೆಗೆದುಕೊಳ್ಳುತ್ತಿದೆ. ಈ ನಡುವೆಯೇ ಬಿವೈಡಿ ಯಾವುದೇ ವಿಳಂಬವಿಲ್ಲದೆ ಭಾರತಕ್ಕೆ ಬಂದು ಘಟಕ ಸ್ಥಾಪಿಸಲು ನಿರ್ಧರಿಸಿರುವುದು ಟೆಸ್ಲಾಗೆ ದೊಡ್ಡ ಸ್ಪರ್ಧೆಯಾಗಿ ಪರಿಣಮಿಸಬಹುದು.
