ಬಾಲಿವುಡ್ ನಟಿ ದೀಪಿಕಾ ಪಡುಕೋಣೆ (Deepika Padukone) ತಮ್ಮ ತಂದೆ ಮತ್ತು ಮಾಜಿ ಬ್ಯಾಡ್ಮಿಂಟನ್ ಆಟಗಾರ ಪ್ರಕಾಶ್ ಪಡುಕೋಣೆಯ 70ನೇ ಹುಟ್ಟುಹಬ್ಬವನ್ನು ವಿಶೇಷವಾಗಿ ಆಚರಿಸಿದರು. ಅವರು ಸ್ಥಾಪಿಸಿರುವ ‘ಪಡುಕೋಣೆ ಸ್ಕೂಲ್ ಆಫ್ ಬ್ಯಾಡ್ಮಿಂಟನ್’ (PSB-Padukone School of Badminton) ಈಗಾಗಲೇ ಬೆಂಗಳೂರಿನ ಜೊತೆಗೆ ಮುಂಬೈ, ದೆಹಲಿ, ಪುಣೆ, ಮೈಸೂರು, ನಾಸಿಕ್, ಪಾಣಿಪತ್ ಮುಂತಾದ 18 ನಗರಗಳಲ್ಲಿ 75ಕ್ಕೂ ಹೆಚ್ಚು ತರಬೇತಿ ಕೇಂದ್ರಗಳನ್ನು ಆರಂಭಿಸಿದೆ.
ದೀಪಿಕಾ ತಮ್ಮ Instagram ನಲ್ಲಿ, “ನಾನು ಬ್ಯಾಡ್ಮಿಂಟನ್ ಆಟದೊಂದಿಗೆ ಬೆಳೆದವಳು. ಈ ಕ್ರೀಡೆ ದೈಹಿಕ, ಮಾನಸಿಕ ಮತ್ತು ಭಾವನಾತ್ಮಕ ಬೆಳವಣಿಗೆಗೆ ಸಹಾಯಕ. PSB ಮೂಲಕ ಎಲ್ಲಾ ವರ್ಗದ ಜನರಿಗೆ ಬ್ಯಾಡ್ಮಿಂಟನ್ ನ ಶಿಸ್ತು ಹಾಗೂ ಖುಷಿಯೊಂದಿಗೆ ಕಲಿಸಲು ನಾವು ಬದ್ಧರಾಗಿದ್ದೇವೆ. ಅಪ್ಪಾ, ನೀವು 70ರಲ್ಲೂ ಈ ಕ್ರೀಡೆಗೆ ಮೀಸಲಿದ್ದೀರಿ. ಹುಟ್ಟುಹಬ್ಬದ ಶುಭಾಶಯಗಳು!” ಎಂದು ಬರೆದು ಭಾವನಾತ್ಮಕ ಸಂದೇಶ ಹಂಚಿಕೊಂಡಿದ್ದಾರೆ.
ಪ್ರಕಾಶ್ ಪಡುಕೋಣೆ ಕೂಡ ಈ ಕುರಿತು ತಮ್ಮ ಭಾವನೆ ಹಂಚಿಕೊಂಡು, “ಕ್ರೀಡೆ ಜೀವನದ ಭಾಗವಾಗಬೇಕು. ಶಿಸ್ತು, ಸ್ಥಿತಿಸ್ಥಾಪಕತೆ ಮತ್ತು ಗೆಲ್ಲುವ ಮನೋಭಾವ ಹೆಚ್ಚಿಸಬೇಕು. PSB ಮೂಲಕ ಉತ್ತಮ ತರಬೇತಿಯನ್ನು ಎಲ್ಲರಿಗೂ ತಲುಪಿಸಲು ಮತ್ತು ಭವಿಷ್ಯದ ಆಟಗಾರರನ್ನು ತಯಾರು ಮಾಡಲು ಪ್ರಯತ್ನಿಸುತ್ತಿದ್ದೇವೆ” ಎಂದರು.
ಈ ವರ್ಷದ ಅಂತ್ಯಕ್ಕೆ PSB 100 ಕೇಂದ್ರಗಳು, ಹಾಗೂ 2027ರೊಳಗೆ 250 ಕೇಂದ್ರಗಳ ಗುರಿಯನ್ನು ಹೊಂದಿದೆ. ದೀಪಿಕಾ ಸಂಸ್ಥಾಪಕಿ, ಅವರ ತಂದೆ ಪ್ರಕಾಶ್ ಮಾರ್ಗದರ್ಶಕರಾಗಿ ಇದರ ಪ್ರಮುಖರಾಗಿದ್ದಾರೆ.
