Delhi: ಟೆಲಿಕಾಂ ಕಂಪನಿಗಳ ಮೇಲಿನ ಭಾರೀ ಆರ್ಥಿಕ ಒತ್ತಡವಾಗಿದ್ದ SUC (ಸ್ಪೆಕ್ಟ್ರಮ್ ಬಳಕೆ ಶುಲ್ಕ) ರದ್ದುಗೊಳಿಸಲು ಸರ್ಕಾರ ನಿರ್ಧರಿಸಿದೆ. ಇದರಿಂದ ಏರ್ಟೆಲ್, ಜಿಯೋ, ವೊಡಾಫೋನ್ ಐಡಿಯಾ ಕಂಪನಿಗಳಿಗೆ ಸಾವಿರಾರು ಕೋಟಿ ರೂಪಾಯಿ ಉಳಿತಾಯವಾಗುವ ಸಾಧ್ಯತೆ ಇದೆ. 2021ರ ಸೆಪ್ಟೆಂಬರಿಗೂ ಮುಂಚೆ ಸ್ಪೆಕ್ಟ್ರಂ ಹರಾಜಿನಲ್ಲಿ ಖರೀದಿಸಿದ ಬಾಂಡ್‌ಗಳ ಮೇಲೆ ಇರುವ ಈ ಶುಲ್ಕವನ್ನು ಸರ್ಕಾರ ಹಿಂದಕ್ಕೆ ಪಡೆಯಲು ಯೋಜಿಸಿದೆ ಎಂದು ಟೈಮ್ಸ್ ಆಫ್ ಇಂಡಿಯಾ ವರದಿ ಮಾಡಿದೆ.
2021ರ ಸೆಪ್ಟೆಂಬರ್ 15ರ ನಂತರ ಹರಾಜಾದ ಸ್ಪೆಕ್ಟ್ರಂಗೆ 2022ರಲ್ಲಿ ಸರ್ಕಾರ SUC ಶುಲ್ಕ ತೆಗೆದುಹಾಕಿತ್ತು. ಆದರೆ, 2021ರ ಮೊದಲಿನ ಹರಾಜುಗಳಿಗೆ ಈ ವಿನಾಯಿತಿ ದೊರಕಿರಲಿಲ್ಲ. ಟೆಲಿಕಾಂ ಕಂಪನಿಗಳು ಗೊಂದಲಕ್ಕೆ ಸಿಲುಕಿದ್ದವು. ಈಗ, ಮುಂಚಿನ ವರ್ಷಗಳಿಗೂ ಇದು ವಿಸ್ತರಿಸಲಿದೆ ಎಂಬ ನಿರೀಕ್ಷೆ ಇದೆ.
SUC ಶುಲ್ಕ ಎಂದರೇನು?
ಟೆಲಿಕಾಂ ಕಂಪನಿಗಳು ಸ್ಪೆಕ್ಟ್ರಂ ಖರೀದಿಸಿದ ಬಳಿಕ ಅದರ ಬಳಕೆಗೆ ಸರ್ಕಾರಕ್ಕೆ ಒಂದು ನಿರ್ದಿಷ್ಟ ಶುಲ್ಕ ನೀಡಬೇಕು. ಇದರಲ್ಲಿ ಶೇ. 8ರಷ್ಟು ಲೈಸೆನ್ಸ್ ಶುಲ್ಕವಿದ್ದು, ಒಟ್ಟು ಆದಾಯದ ಶೇ. 3-4ರಷ್ಟು ಮೊತ್ತವನ್ನು SUC ಶುಲ್ಕವಾಗಿ ಸರ್ಕಾರಕ್ಕೆ ಪಾವತಿಸಬೇಕಾಗುತ್ತದೆ.
5ಜಿ ಅಳವಡಿಕೆ ಮತ್ತು ಭವಿಷ್ಯದ 6ಜಿ ತಂತ್ರಜ್ಞಾನಕ್ಕಾಗಿ ಟೆಲಿಕಾಂ ಕಂಪನಿಗಳಿಗೆ ಭಾರೀ ಬಂಡವಾಳದ ಅಗತ್ಯವಿದೆ. ಎಸ್ಯುಸಿ ಮನ್ನಾದರೆ, ಈ ಹಣವನ್ನು ಟೆಕ್ನಾಲಜಿ ಅಭಿವೃದ್ಧಿಗೆ ಬಳಸಬಹುದು. ಅಲ್ಲದೆ, ಸ್ಟಾರ್ಲಿಂಕ್‌ನಂತಹ ಹೊಸ ಸ್ಪರ್ಧಾಕಾರಕರಿಗೆ ಎದುರಿಸಲು ಸಹಾಯವಾಗಬಹುದು.
ಸ್ಪೆಕ್ಟ್ರಂ ಹರಾಜಿನಲ್ಲಿ ಸರ್ಕಾರ ನಿರೀಕ್ಷೆಗಿಂತಲೂ ಹೆಚ್ಚಿನ ಆದಾಯ ಗಳಿಸಿದ್ದು, ಈ ಹೆಚ್ಚುವರಿ ಹಣವೇ SUC ಶುಲ್ಕದ ಅಗತ್ಯವನ್ನು ಕಡಿಮೆ ಮಾಡಿದೆ. ಹೀಗಾಗಿ, ಸರ್ಕಾರ ಈಗ ಈ ಶುಲ್ಕವನ್ನು ಹಿಂಪಡೆಯಲು ನಿರ್ಧರಿಸಿದೆ.
