Bengaluru: ಈಗಿನ ಬೆಳಗ್ಗೆ ಗೂಗಲ್ ಕ್ಲೌಡ್ ಸೇವೆ ತಾತ್ಕಾಲಿಕವಾಗಿ (Google Cloud issue) ಸ್ಥಗಿತಗೊಂಡಿದೆ. ಇದರ ಪರಿಣಾಮವಾಗಿ ವಿಶ್ವದಾದ್ಯಂತ ಹಲವಾರು ಪ್ರಮುಖ ಆನ್‌ಲೈನ್ ಸೇವೆಗಳು ಅಡ್ಡಿಪಡಿಸಿವೆ. ಬಳಕೆದಾರರು ಟ್ವಿಟ್ಟರ್ ಮತ್ತು ಇತರ ಸಾಮಾಜಿಕ ಜಾಲತಾಣಗಳಲ್ಲಿ ಈ ಬಗ್ಗೆ ದೂರುಗಳನ್ನು ಹಂಚುತ್ತಿದ್ದಾರೆ.
ಅಮೆಜಾನ್ ವೆಬ್ ಸರ್ವೀಸ್ (AWS), ಸ್ನ್ಯಾಪ್‌ಚಾಟ್, ಸ್ಪಾಟಿಫೈ, ಡಿಸ್ಕಾರ್ಡ್ ಮತ್ತು Character.ai ಮುಂತಾದ ಸೇವೆಗಳ ಬಳಕೆದಾರರೂ ತೊಂದರೆ ಅನುಭವಿಸುತ್ತಿದ್ದಾರೆ. ಜಿಮೇಲ್, ಗೂಗಲ್ ಸರ್ಚ್, ಗೂಗಲ್ ಮ್ಯಾಪ್ಸ್ ಹಾಗೂ ನೆಸ್ಟ್‌ ಸೇವೆಗಳು ಇನ್ನೂ ಕೆಲವು ಸ್ಥಳಗಳಲ್ಲಿ ನಿಧಾನವಾಗಿ ಅಥವಾ ಸಂಪೂರ್ಣವಾಗಿ ಕೆಲಸ ನಿಲ್ಲಿಸಿದ್ದವು.
ಡೌನ್‌ಡೆಟೆಕ್ಟರ್ ಎಂಬ ತಂತ್ರಾಂಶ ವೆಬ್‌ಸೈಟ್ ಪ್ರಕಾರ, ಈ ತಾಂತ್ರಿಕ ತೊಂದರೆ ಗೂಗಲ್ ಕ್ಲೌಡ್‌ನ US-Central1 ಎಂಬ ವಲಯದಲ್ಲಿ ಹೆಚ್ಚು ಕಾಣಿಸಿಕೊಂಡಿದೆ.
ಗೂಗಲ್ ತನ್ನ ಕ್ಲೌಡ್ ಸ್ಥಿತಿ ಮಾಹಿತಿ ಡ್ಯಾಶ್‌ಬೋರ್ಡ್‌ನಲ್ಲಿ ಎರಡು ಬಾರಿ ನವೀಕರಣ ನೀಡಿ, ತಾಂತ್ರಿಕ ತೊಂದರೆ ಪತ್ತೆಯಾಗಿದೆ ಮತ್ತು ತಜ್ಞರು ಪರಿಹಾರಕ್ಕೆ ಕೆಲಸ ಮಾಡುತ್ತಿದ್ದಾರೆ ಎಂದು ತಿಳಿಸಿದೆ.
ಇಂದು ಬೆಳಿಗ್ಗೆ 6 ಗಂಟೆಗೆ ಗೂಗಲ್ ಘೋಷಣೆ ನೀಡಿದ್ದು, ಭಾರತದಲ್ಲಿ ಗೂಗಲ್ ಕ್ಲೌಡ್ ಸೇವೆಗಳು ಮತ್ತೆ ಸಾಮಾನ್ಯವಾಗಿ ಕಾರ್ಯನಿರ್ವಹಿಸುತ್ತಿವೆ. ಆದರೆ ಅಮೆರಿಕದ ಕೆಲ ಭಾಗಗಳಲ್ಲಿ ಇನ್ನೂ ತೊಂದರೆ ಮುಂದುವರಿದಿದೆ.
