Koppal: ರಾಜ್ಯದ ಈಶಾನ್ಯ ಭಾಗದಲ್ಲಿ ಹೆಚ್ಚುತ್ತಿರುವ ಬಿಸಿಲಿನ ತಾಪಮಾನವನ್ನು ಗಮನಿಸಿ, ಸರಕಾರವು ಬುಧವಾರ ಸರಕಾರಿ ಕಚೇರಿಗಳ (Government office) ಸಮಯವನ್ನು ಬದಲಾಯಿಸುವ ಆದೇಶ ಹೊರಡಿಸಿದೆ. ಆದೇಶದ ಅನುಸಾರ, ಕಚೇರಿಗಳು ಮುಂಜಾನೆ 8 ರಿಂದ ಮದ್ಯಾಹ್ನ 10.30ರವರೆಗೆ ಕಾರ್ಯನಿರ್ವಹಿಸಬೇಕಾಗಿತ್ತು.
ಈ ಬಾರಿ ಬೇಸಿಗೆಯಲ್ಲಿ ಕೊಪ್ಪಳ ಸೇರಿದಂತೆ ಸುತ್ತಮುತ್ತಲಿನ ಜಿಲ್ಲೆಗಳಲ್ಲೂ ತೀವ್ರ ಬಿಸಿಲು ದಾಖಲಾಗಿದೆ. ಕಳೆದ ಐದು ವರ್ಷಗಳಲ್ಲಿ ಕರೋನಾ ಕಾರಣದಿಂದ ಸರಕಾರಿ ಕಚೇರಿ ಅವಧಿಯಲ್ಲಿ ಯಾವುದೇ ಬದಲಾವಣೆ ಮಾಡಿರಲಿಲ್ಲ. ಆದರೆ, ರಾಜ್ಯ ಸರಕಾರಿ ನೌಕರರ ಸಂಘದ ಮನವಿ ಮೇರೆಗೆ ಮೇ ಅಂತ್ಯದವರೆಗೂ ಹೊಸ ಸಮಯವನ್ನು ಅನುಸರಿಸಲು ಸರಕಾರ ಆದೇಶ ನೀಡಿದೆ.
ಆದೇಶದ ಪಾಲನೆಯು ನಡೆಯುತ್ತಿದೆಯೇ ಎಂದು ಪರಿಶೀಲನೆ ನಡೆಸಲು ಮಾಧ್ಯಮ ಪ್ರತಿನಿಧಿಗಳು ಬೆಳಗ್ಗೆ 8 ಗಂಟೆಗೆ ಕೊಪ್ಪಳ ಜಿಲ್ಲಾಡಳಿತ ಭವನಕ್ಕೆ ಭೇಟಿ ನೀಡಿದಾಗ, ಮುಖ್ಯ ದ್ವಾರವೇ ಮುಚ್ಚಿರಲು ಕಂಡುಬಂತು. ಶೇ.90 ರಷ್ಟು ಸಿಬ್ಬಂದಿ ಕಚೇರಿಗೆ ಬಂದಿರಲಿಲ್ಲ. ಅಧಿಕಾರಿಗಳೂ ಹಾಜರಾಗಿರಲಿಲ್ಲ, ಕೇವಲ ಡಿ ಮತ್ತು ಸಿ ದರ್ಜೆಯ ಕೆಲವು ಸಿಬ್ಬಂದಿ ಮಾತ್ರ ಆಗಮಿಸಿದ್ದರು.
ಜಿಲ್ಲಾ ನೌಕರರ ಸಂಘದ ಅಧ್ಯಕ್ಷ ನಾಗರಾಜ ಜುಮ್ಮಣ್ಣನವರ್ ಮಾತನಾಡಿ, “ಹಿರಿಯ ಮತ್ತು ಆರೋಗ್ಯ ಸಮಸ್ಯೆ ಇರುವ ನೌಕರರ ದೃಷ್ಟಿಯಿಂದ ಸರಕಾರಕ್ಕೆ ಮನವಿ ಸಲ್ಲಿಸಿದ್ದೇವೆ. ಆದೇಶ ಪಾಲನೆ ಮಾಡಲು ನೌಕರರು ಸಹಕರಿಸಬೇಕು,” ಎಂದು ಹೇಳಿದರು.
“ಮೊದಲ ದಿನವಾಗಿರುವುದರಿಂದ ಎಲ್ಲಾ ಸಿಬ್ಬಂದಿಗೆ ಸಮಯ ಪಾಲನೆ ಮಾಡುವಂತೆ ಸೂಚನೆ ನೀಡಲಾಗಿದೆ. ಆದೇಶವನ್ನು ಉಲ್ಲಂಘಿಸಿದರೆ ಕ್ರಮ ಕೈಗೊಳ್ಳಲಾಗುವುದು,” ಎಂದು ಸಿಇಓ ರಾಹುಲ್ ರತ್ನಂ ಪಾಂಡೆಯಾ ಹೇಳಿದರು.
ಸರಕಾರ ನೌಕರರ ಹಾಗೂ ಸಾರ್ವಜನಿಕರ ಆರೋಗ್ಯ ರಕ್ಷಣೆಗೆ ಈ ಕ್ರಮ ಕೈಗೊಂಡರೂ, ಅಧಿಕಾರಿಗಳು ಸಮಯ ಪಾಲನೆ ಮಾಡದೆ ಇರುವುದರಿಂದ ಸರಕಾರಿ ಕಾರ್ಯಗಳಲ್ಲಿ ವಿಳಂಬವಾಗಬಹುದೆಂಬ ಸಾರ್ವಜನಿಕ ಅಸಮಾಧಾನ ವ್ಯಕ್ತವಾಗಿದೆ.
