Bengaluru: ಸಿಲಿಕಾನ್ ಸಿಟಿ ಬೆಂಗಳೂರಿನ ಆಡಳಿತಕ್ಕೆ ಸರ್ಕಾರವು ಗ್ರೇಟರ್ ಬೆಂಗಳೂರು ಅಥಾರಿಟಿ (GBA) ಯನ್ನು ರಚಿಸಿತ್ತು. ಈಗ ಅದೇ ಜಿಬಿಎ ಮೂಲಕ ನಗರದ ವಾರ್ಡ್‌ಗಳನ್ನು ಪುನರ್ ವಿಂಗಡಿಸುವ ಪ್ರಕ್ರಿಯೆ ಆರಂಭವಾಗಿದೆ. ಪ್ರಸ್ತುತ 198 ವಾರ್ಡ್‌ಗಳಿರುವುದರಿಂದ, ಮುಂದಿನ ದಿನಗಳಲ್ಲಿ ಅವನ್ನು 400 ವಾರ್ಡ್‌ಗಳಾಗಿ ವಿಭಜಿಸುವ ಸಾಧ್ಯತೆ ಇದೆ.
ಜಿಬಿಎ ಅಧಿಕಾರಿಗಳು ಜನಸಂಖ್ಯೆ ಹಾಗೂ ಜಿಪಿಎಸ್ ಮಾಹಿತಿ ಆಧರಿಸಿ ಹೊಸ ವಾರ್ಡ್‌ಗಳ ಗಡಿಯನ್ನು ನಿಗದಿಪಡಿಸಲಿದ್ದಾರೆ. 2011ರ ಜನಗಣತಿಯ ಅಂಕಿಅಂಶಗಳನ್ನು ಆಧರಿಸಿ ಪುನರ್ ವಿಂಗಡಣೆ ಮಾಡಲು ಯೋಜನೆ ರೂಪಿಸಲಾಗಿದೆ.
ಹೊಸ ಪ್ರಸ್ತಾವನೆಯಂತೆ ನಾಲ್ಕು ನಗರ ಪಾಲಿಕೆಗಳಿಗೆ ತಲಾ 75 ವಾರ್ಡ್‌ಗಳು ಮತ್ತು ಪಶ್ಚಿಮ ಪಾಲಿಕೆಗೆ 100 ವಾರ್ಡ್‌ಗಳ ಹಂಚಿಕೆ ಸಾಧ್ಯತೆ ಇದೆ. ಪ್ರತಿ ವಾರ್ಡ್‌ಗೆ ಸರಾಸರಿ 17ರಿಂದ 23 ಸಾವಿರ ಜನಸಂಖ್ಯೆ ನಿಗದಿ ಮಾಡುವ ಯೋಚನೆ ಇದೆ.
ಬೆಂಗಳೂರು ಅಭಿವೃದ್ಧಿ ಹಾಗೂ ಆಡಳಿತ ವಿಕೇಂದ್ರೀಕರಣದ ಭಾಗವಾಗಿ ಸರ್ಕಾರ ಜಿಬಿಎಗೆ ಈ ಜವಾಬ್ದಾರಿಯನ್ನು ನೀಡಿದೆ. ನವೆಂಬರ್ ಒಳಗಾಗಿ ಜಿಬಿಎ ವರದಿ ಸರ್ಕಾರಕ್ಕೆ ಸಲ್ಲಿಸಲಿದ್ದು, ವಾರ್ಡ್‌ಗಳ ಹೊಸ ರೂಪುರೇಷೆ ಹೇಗಿರುತ್ತದೆ ಎಂಬುದು ಶೀಘ್ರದಲ್ಲೇ ಸ್ಪಷ್ಟವಾಗಲಿದೆ.
