New Delhi: ಹಮಾಸ್ (Hamas) ಉಗ್ರಗಾಮಿಗಳು ಇಂದು ಮೂರು ಇಸ್ರೇಲಿ ಒತ್ತೆಯಾಳುಗಳನ್ನು ಬಿಡುಗಡೆ ಮಾಡಿದ್ದಾರೆ. ಗಾಜಾ ಕದನ ವಿರಾಮ ಒಪ್ಪಂದದ ಭಾಗವಾಗಿ, ಇಸ್ರೇಲ್ ಮತ್ತು ಹಮಾಸ್ ಒತ್ತೆಯಾಳುಗಳ ವಿನಿಮಯಕ್ಕೆ ಒಪ್ಪಿಕೊಂಡಿವೆ. ಈ ಒತ್ತೆಯಾಳುಗಳನ್ನು ರೆಡ್ ಕ್ರಾಸ್ಗೆ ಹಸ್ತಾಂತರಿಸಲಾಗಿದ್ದು, ಇಸ್ರೇಲ್ ರಕ್ಷಣಾ ಪಡೆ ಇದನ್ನು ಸ್ವೀಕರಿಸಿದೆ.
369 ಪ್ಯಾಲೆಸ್ಟೀನಿಯನ್ ಕೈದಿಗಳನ್ನು ಬಿಡುಗಡೆ ಮಾಡುವ ಬದಲಾಗಿ, ಹಮಾಸ್ ಈ ಮೂರು ಇಸ್ರೇಲಿ ಒತ್ತೆಯಾಳುಗಳನ್ನು ಬಿಡುಗಡೆ ಮಾಡಿದೆ. ಈಜಿಪ್ಟ್ ಮತ್ತು ಕತಾರ್ ಅಧಿಕಾರಿಗಳ ಮಧ್ಯಸ್ಥಿಕೆಯಿಂದ ಈ ಒಪ್ಪಂದ ಸಾಧ್ಯವಾಯಿತು. ಹಮಾಸ್, ಅಕ್ಟೋಬರ್ 7, 2023ರಲ್ಲಿ ನಡೆದ ದಾಳಿಯ ವೇಳೆ ಒತ್ತೆಯಾಳುಗಳನ್ನು ವಶಪಡಿಸಿಕೊಂಡಿತ್ತು. ಇಂದು ರೆಡ್ ಕ್ರಾಸ್ ಮೂಲಕ ಅವರನ್ನು ಇಸ್ರೇಲಿಗೆ ಹಸ್ತಾಂತರಿಸಲಾಗಿದೆ.
ಬಿಡುಗಡೆಯಾದ ಇಸ್ರೇಲಿ ಪ್ರಜೆಗಳು
- ಇಯಾರ್ ಹಾರ್ನ್ (46) – ಇಸ್ರೇಲ್ ಮತ್ತು ಅರ್ಜೆಂಟೀನಾದ ದ್ವಿ ಪೌರತ್ವ ಹೊಂದಿದವರು.
- ಸಗುಯಿ ಡೆಕೆಲ್ ಚೆನ್ (36) – ಅಮೆರಿಕನ್-ಇಸ್ರೇಲಿ ಪ್ರಜೆ.
- ಅಲೆಕ್ಸಾಂಡರ್ (ಸಾಶಾ) ಟ್ರೌಫನೋವ್ (29) – ರಷ್ಯನ್-ಇಸ್ರೇಲಿ ಪ್ರಜೆ.
ಈ ಮೂವರನ್ನು ತಕ್ಷಣವೇ ವೈದ್ಯಕೀಯ ಪರೀಕ್ಷೆಗೆ ಕರೆದೊಯ್ಯಲಾಗಿದ್ದು, ಅವರು ತಮ್ಮ ಕುಟುಂಬದವರೊಂದಿಗೆ ಪುನಃ ಸೇರುವಂತೆ ವ್ಯವಸ್ಥೆ ಮಾಡಲಾಗಿದೆ. ಅವರ ಬಿಡುಗಡೆಗೆ ಕುಟುಂಬಸ್ಥರು ಭಾವೋದ್ರಿಕ್ತರಾಗಿದ್ದು, ಅವರ ಸಂತೋಷದ ಕ್ಷಣಗಳ ವಿಡಿಯೋಗಳು ವೈರಲ್ ಆಗಿವೆ.
ಈ ಕೈದಿಗಳ ವಿನಿಮಯ ಒಪ್ಪಂದದಡಿಯಲ್ಲಿ, ಒಟ್ಟೂ 19 ಇಸ್ರೇಲಿ ಒತ್ತೆಯಾಳುಗಳನ್ನು ಇದುವರೆಗೆ ಬಿಡುಗಡೆ ಮಾಡಲಾಗಿದೆ. ಆದರೆ ಇನ್ನೂ ಅನೇಕ ಮಂದಿ ಹಮಾಸ್ ವಶದಲ್ಲಿದ್ದಾರೆ. ಗಾಜಾದ ಪರಿಸ್ಥಿತಿ ಗಂಭೀರವಾಗಿದ್ದು, ಸಾವಿರಾರು ಜನ ನಿರಾಶ್ರಿತರಾಗಿದ್ದಾರೆ. ಹಮಾಸ್-ಇಸ್ರೇಲ್ ನಡುವಿನ ಶಾಂತಿ ಪ್ರಯತ್ನಗಳು ಮುಂದುವರಿಯುತ್ತಿವೆ.
