Hyderabad: ತೆಲಂಗಾಣ ಮುಖ್ಯಮಂತ್ರಿ ರೇವಂತ್ ರೆಡ್ಡಿಯವರು “ಆಪರೇಷನ್ ಸಿಂಧೂರ್” ಮತ್ತು “ಕದನ ವಿರಾಮ” ಕುರಿತು ನೀಡಿದ ಹೇಳಿಕೆಗೆ ಕೇಂದ್ರ ಸಚಿವ ಕಿಶನ್ ರೆಡ್ಡಿಯವರು (Union Minister Kishan Reddy) ಕಿಡಿಕಾರಿದ್ದಾರೆ. ರಾಹುಲ್ ಗಾಂಧಿ ಮತ್ತು ರೇವಂತ್ ರೆಡ್ಡಿಯವರು ಭಾರತದ ಸೈನ್ಯವನ್ನು ಅವಮಾನಿಸುತ್ತಿದ್ದಾರೆ ಎಂದು ಅವರು ಹೇಳಿದರು.
ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಪ್ರಧಾನಿ ಮೋದಿ ನೇತೃತ್ವದ ಆಪರೇಷನ್ ಸಿಂಧೂರ್ 23 ನಿಮಿಷಗಳಲ್ಲಿ ಪಾಕಿಸ್ತಾನದ 9 ಉಗ್ರರ ಶಿಬಿರಗಳನ್ನು ನಾಶ ಮಾಡಿದೆ ಎಂಬುದನ್ನು ಪಾಕಿಸ್ತಾನದ ಪ್ರಧಾನಮಂತ್ರಿ ಮತ್ತು ಸೇನೆ ಸಹ ಒಪ್ಪಿಕೊಂಡಿವೆ ಎಂದು ಹೇಳಿದರು. ಭಾರತವು ಈ ದಾಳಿಯ ವಿಡಿಯೋ ಪುರಾವೆಗಳನ್ನು ಜಾಗತಿಕವಾಗಿ ತೋರಿಸಿದೆ. ಪಾಕಿಸ್ತಾನದೊಂದಿಗೆ ವ್ಯವಹಾರ, ನೀರಿನ ಒಪ್ಪಂದ, ರಾಜತಾಂತ್ರಿಕ ಸಂಬಂಧಗಳನ್ನು ಸ್ಥಗಿತಗೊಳಿಸಿ ದೇಶ ಒಗ್ಗಟ್ಟಾಗಿ ನಿಂತಿತು.
ಆದರೆ, ಇಂತಹ ಸಂವೇದನಾಶೀಲ ಸಮಯದಲ್ಲಿ ರಾಹುಲ್ ಗಾಂಧಿ ಮತ್ತು ರೇವಂತ್ ರೆಡ್ಡಿಯವರು ಸುಳ್ಳುಗಳನ್ನು ಹರಡಿದರು, ಸೇನೆಯ ಕಾರ್ಯಕ್ಷಮತೆಯನ್ನೇ ಪ್ರಶ್ನಿಸಿದರು. “ಸೈನಿಕರನ್ನು ಗೌರವಿಸುವ ಬದಲು ಎಷ್ಟು ರಫೇಲ್ ವಿಮಾನಗಳನ್ನು ನಾಶ ಮಾಡಲಾಗಿದೆ ಎಂದು ಕೇಳಿದರೆ, ಅದು ಅವರ ಮನೋಬಲವನ್ನು ಕುಗ್ಗಿಸುತ್ತದೆ” ಎಂದು ಕಿಶನ್ ರೆಡ್ಡಿ ಹೇಳಿದರು.
ಮೋದಿಯವರು ಕಾಂಗ್ರೆಸ್ ಆಡಳಿತಕ್ಕಿಂತ ಭಿನ್ನವಾಗಿ ದೃಢ ನಿರ್ಧಾರಗಳನ್ನು ತೆಗೆದುಕೊಂಡಿದ್ದಾರೆ. ಯುಪಿಎ ಆಡಳಿತದಲ್ಲಿ ಭಯೋತ್ಪಾದನೆಗೆ ತೀವ್ರ ಪ್ರತಿಕ್ರಿಯೆ ಕಾಣಲಿಲ್ಲ, ಆದರೆ ಮೋದಿ ಆಡಳಿತದಲ್ಲಿ ಸೇನೆಗೆ ಮುಕ್ತವಾಗಿಯೇ ಪ್ರತೀಕಾರ ತೀರಿಸಲು ಅವಕಾಶ ನೀಡಲಾಗಿದೆ. ರಾಹುಲ್ ಗಾಂಧಿಯವರು ಪಾಕಿಸ್ತಾನವೂ ಹೇಳದ ಸುಳ್ಳುಗಳನ್ನು ಆಧಾರವಿಲ್ಲದೆ ಹರಡುತ್ತಿದ್ದಾರೆ ಎಂದು ಅವರು ಟೀಕಿಸಿದರು.
ಪಾಕಿಸ್ತಾನದ ಪ್ರಧಾನಿ ಭಾರತದ ಮೇಲೆ ದಾಳಿ ಮಾಡಲು ಯೋಜಿಸಿದ ನಂತರ, ಭಾರತೀಯ ಸೇನೆ ತಕ್ಷಣವೇ ಪ್ರತಿಕ್ರಿಯೆ ನೀಡಿದಂತೆ ಪಾಕಿಸ್ತಾನೀ ಸೇನೆಯೇ ಒಪ್ಪಿಕೊಂಡಿದೆ. ಆದರೆ ಕಾಂಗ್ರೆಸ್ ನಾಯಕರು ಈ ದಾಳಿಯ ಹಿನ್ನಲೆಯಲ್ಲಿ ಸುಳ್ಳು ಮಾಹಿತಿ ಹರಡುತ್ತಿದ್ದಾರೆ ಎಂದು ಕಿಶನ್ ರೆಡ್ಡಿಯವರು ಆರೋಪಿಸಿದರು.
