New Delhi: ಭಾರತೀಯ ಉದ್ಯಮ ವಲಯದಲ್ಲಿ ಸಾಗಣೆ ವ್ಯವಸ್ಥೆಯನ್ನು ಬಲಪಡಿಸಲು ಕೇಂದ್ರ ವಾಣಿಜ್ಯ ಸಚಿವ ಪೀಯೂಶ್ ಗೋಯಲ್ ಹೊಸ ಏಕೀಕೃತ ಲಾಜಿಸ್ಟಿಕ್ಸ್ ಯೋಜನೆಗಳನ್ನು ಅನಾವರಣಗೊಳಿಸಿದರು. ಬೆಂಗಳೂರು ಸೇರಿದಂತೆ ಎಂಟು ನಗರಗಳಲ್ಲಿ ಈ ಯೋಜನೆ ಜಾರಿ ಮಾಡಲಾಗುತ್ತಿದೆ. ಈ ಯೋಜನೆಯ ಉದ್ದೇಶ ಲಾಜಿಸ್ಟಿಕ್ಸ್ ಸೌಲಭ್ಯಗಳನ್ನು ಪರಿಶೀಲಿಸುವುದು, ಲೋಪಗಳನ್ನು ಗುರುತಿಸುವುದು, ವ್ಯವಸ್ಥೆಯನ್ನು ಬಲಪಡಿಸುವುದು ಮತ್ತು ವೆಚ್ಚ ಕಡಿಮೆ ಮಾಡುವ ಮಾರ್ಗಗಳನ್ನು ಶೋಧಿಸುವುದು.
ಸದ್ಯ ಅಹ್ಮದಾಬಾದ್, ಬೆಂಗಳೂರು, ಚೆನ್ನೈ, ದೆಹಲಿ, ಹೈದರಾಬಾದ್, ಕೋಲ್ಕತಾ, ಮುಂಬೈ ಮತ್ತು ಪುಣೆ ನಗರಗಳಲ್ಲಿ ಈ ಯೋಜನೆ ಜಾರಿಗೆ ಬಂದಿದೆ. ಮುಂದಿನ ದಿನಗಳಲ್ಲಿ ಇದನ್ನು ದೇಶಾದ್ಯಂತ ವಿಸ್ತರಿಸುವ ಗುರಿಯಿದೆ.
ಲಾಜಿಸ್ಟಿಕ್ಸ್ ವ್ಯವಸ್ಥೆಯ ಮಹತ್ವ: ಲಾಜಿಸ್ಟಿಕ್ಸ್ ವ್ಯವಸ್ಥೆ ಉದ್ಯಮಗಳು ಸರಾಗವಾಗಿ ಕಾರ್ಯನಿರ್ವಹಿಸಲು ಮುಖ್ಯ. ಉತ್ಪನ್ನಗಳು ಕಾರ್ಖಾನೆಯಿಂದ ಬೇರೆ ಪ್ರದೇಶಗಳಿಗೆ ತಲುಪಲು, ವಿದೇಶಗಳಿಗೆ ಕಳುಹಿಸಲು ಈ ವ್ಯವಸ್ಥೆ ಅವಶ್ಯಕ. ಕೆಲ ಸರಕುಗಳು ಟ್ರಕ್, ರೈಲು ಅಥವಾ ಹಡಗುಗಳಲ್ಲಿ ಸಾಗಿಸುತ್ತಾರೆ; ಕೆಲವು ವಿಮಾನಗಳಲ್ಲಿ ಕಳುಹಿಸಲಾಗುತ್ತವೆ.
ಭಾರತದಲ್ಲಿ ಲಾಜಿಸ್ಟಿಕ್ಸ್ ಲೋಪಗಳ ಕಾರಣದಿಂದ ಸಾಕಷ್ಟು ವ್ಯಯವಾಗುತ್ತದೆ. ಹಿಂದಿನ ಅಂದಾಜು ಪ್ರಕಾರ, ಲಾಜಿಸ್ಟಿಕ್ಸ್ ವೆಚ್ಚ ಜಿಡಿಪಿಯ ಶೇ. 13–14 ರಷ್ಟಾಗುತ್ತಿತ್ತು. ಈಗ ಹೊಸ ವೈಜ್ಞಾನಿಕ ವಿಧಾನವನ್ನು ಅಳವಡಿಸಿರುವುದರಿಂದ ಈ ವೆಚ್ಚವನ್ನು ಶೇ. 7.97 ರಷ್ಟು ತಗ್ಗಿಸಲು ಸಾಧ್ಯ.
ಎಚ್ಎಸ್ಎನ್ ಕೋಡ್ ಗಳ ಸಮಗ್ರ ಕೈಪಿಡಿ: ಪೀಯೂಶ್ ಗೋಯಲ್ ಸೆಪ್ಟೆಂಬರ್ 21ರಂದು ಎಚ್ಎಸ್ಎನ್ (ಹಾರ್ಮೋನೈಸ್ಡ್ ಸಿಸ್ಟಂ ಆಫ್ ನಾಮೆಂಕ್ಲೇಚರ್) ಕೋಡ್ ಗಳ ಸಮಗ್ರ ಕೈಪಿಡಿ ಬಿಡುಗಡೆ ಮಾಡಿದರು. ಇದರಲ್ಲಿ 31 ಸಚಿವಾಲಯಗಳು ಮತ್ತು 12,167 ಕೋಡ್ ಗಳನ್ನು ಒಳಗೊಂಡಿದೆ. ಎಚ್ಎಸ್ಎನ್ ಕೋಡ್ ಸರಕುಗಳನ್ನು ತೆರಿಗೆ, ಸುಂಕ ಮೊದಲಾದ ಉದ್ದೇಶಗಳಿಗೆ ವರ್ಗೀಕರಿಸಲು ಬಳಸಲಾಗುತ್ತದೆ. ಇದರಿಂದ ಉದ್ಯಮಗಳು ವಿವಿಧ ಇಲಾಖೆಗಳೊಂದಿಗೆ ಸಮನ್ವಯ ಸಾಧಿಸಬಹುದು.
ಪೀಯೂಶ್ ಗೋಯಲ್ ಲಾಜಿಸ್ಟಿಕ್ಸ್ ಡಾಟಾ ಬ್ಯಾಂಕ್ 2.0 ಅನಾವರಣಗೊಳಿಸಿದರು. ಇದು ಹಡಗುಗಳಲ್ಲಿ ಸಾಗುತ್ತಿರುವ ಸರಕುಗಳನ್ನು ರಿಯಲ್ ಟೈಮ್ನಲ್ಲಿ ಟ್ರ್ಯಾಕ್ ಮಾಡಲು ನೆರವಾಗುತ್ತದೆ.
