Tokyo: ಪ್ರಧಾನಿ ನರೇಂದ್ರ ಮೋದಿ ಅವರ ಜಪಾನ್ ಭೇಟಿಯಲ್ಲಿ ಮಹತ್ವದ ಘೋಷಣೆ ಆಗುವ ಸಾಧ್ಯತೆ ಇದೆ. ವರದಿ ಪ್ರಕಾರ, ಜಪಾನ್ ಸರ್ಕಾರ 10 ಟ್ರಿಲಿಯನ್ ಯೆನ್ (ಸುಮಾರು 68 ಬಿಲಿಯನ್ ಡಾಲರ್), ಅಂದರೆ 6 ಲಕ್ಷ ಕೋಟಿ ರೂಪಾಯಿ ಹೂಡಿಕೆ ಮಾಡಲು ಸಿದ್ಧವಾಗಿದೆ.
2022ರಲ್ಲಿ ಜಪಾನ್ ಪ್ರಧಾನಿ ಫುಮಿಯೋ ಕಿಶಿದಾ ಭಾರತಕ್ಕೆ ಬಂದಾಗ 5 ಟ್ರಿಲಿಯನ್ ಯೆನ್ ಹೂಡಿಕೆ ಘೋಷಿಸಿದ್ದರು. ಈಗ ಅದನ್ನೇ ದ್ವಿಗುಣಗೊಳಿಸಿ 10 ಟ್ರಿಲಿಯನ್ ಯೆನ್ ಹೂಡಿಕೆ ಮಾಡುವ ನಿರೀಕ್ಷೆಯಿದೆ.
ಪ್ರಧಾನಿ ಮೋದಿ ಆಗಸ್ಟ್ 29ರಂದು ಜಪಾನ್‌ಗೆ ತೆರಳಿ, ಮೂರು ದಿನಗಳ ಕಾಲ ಭಾರತ-ಜಪಾನ್ ಸಮಿಟ್‌ನಲ್ಲಿ ಪಾಲ್ಗೊಳ್ಳಲಿದ್ದಾರೆ. ಸಭೆಯ ನಂತರ ಎರಡೂ ದೇಶಗಳ ಪ್ರಧಾನಿಗಳಿಂದ ಜಂಟಿ ಹೇಳಿಕೆ ಹೊರಬರುವ ಸಾಧ್ಯತೆ ಇದೆ.
ಮೋದಿ ಅವರ ಈ ಭೇಟಿಯಲ್ಲಿ ಮುಂಬೈ-ಅಹಮದಾಬಾದ್ ಬುಲೆಟ್ ಟ್ರೈನ್ ಯೋಜನೆ ಪ್ರಮುಖ ವಿಷಯವಾಗಲಿದೆ. ಜಪಾನ್ ಹೊಸ ತಲೆಮಾರಿನ ಇ10 ಸರಣಿಯ ಶಿಂಕನ್ಸೆನ್ ಟ್ರೈನ್ ಮಾದರಿಯನ್ನು ಭಾರತಕ್ಕೆ ನೀಡಲು ಸಿದ್ದವಾಗಿದೆ. ಈ ಅತಿ ವೇಗದ ರೈಲು ಭಾರತ-ಜಪಾನ್ ಸ್ನೇಹ ಬಲಪಡಿಸುವುದರ ಜೊತೆಗೆ ಎರಡೂ ದೇಶಗಳ ಪ್ರಗತಿಗೆ ದಾರಿಯಾಗಲಿದೆ.
