Bengaluru: ನಮ್ಮ ಮೆಟ್ರೋ (Metro) ಟಿಕೆಟ್ ದರ ಹೆಚ್ಚಾದ ನಂತರ, ದಿನದಿಂದ ದಿನಕ್ಕೆ ಮೆಟ್ರೋ ಪ್ರಯಾಣಿಕರ ಸಂಖ್ಯೆ ಕಡಿಮೆಯಾಗುತ್ತಿದೆ. ಇದರ ಪರಿಣಾಮವಾಗಿ ಮೆಟ್ರೋ ಸಂಸ್ಥೆ BMRCL ಗೆ ಆದಾಯದಲ್ಲಿ ನಷ್ಟವಾಗುತ್ತಿದೆ. ಈ ನಷ್ಟವನ್ನು ಸಮತೋಲನಗೊಳಿಸಲು, ಮೆಟ್ರೋ ರೈಲುಗಳ ಒಳಭಾಗ ಮತ್ತು ಹೊರಭಾಗದಲ್ಲಿ ಜಾಹೀರಾತು ಹಾಕಲು ನಿರ್ಧರಿಸಲಾಗಿದೆ.
ಈಗಾಗಲೇ ನೇರಳೆ ಮಾರ್ಗದ 33 ಮತ್ತು ಹಸಿರು ಮಾರ್ಗದ 24 ರೈಲುಗಳಲ್ಲಿ ಜಾಹೀರಾತು ಅಳವಡಿಸಲಾಗಿದೆ. ಒಟ್ಟು 57 ರೈಲುಗಳಲ್ಲಿ ಜಾಹೀರಾತು ಹಾಕಲು ಅವಕಾಶ ನೀಡಲಾಗಿದೆ. ರೈಲುಗಳ ಮೂಲ ಬಣ್ಣ ಉಳಿಸಿಕೊಂಡು ಬಣ್ಣಬಣ್ಣದ ಜಾಹೀರಾತು ಹಾಕಲಾಗುತ್ತಿದೆ. ಇದುವರೆಗೆ ಯಾವುದೇ ಜಾಹೀರಾತು ಇರಲಿಲ್ಲ ಆದರೆ ಈಗ ಎಲ್ಲಾ ರೈಲುಗಳ ಒಳಗೂ ಹೊರಗೂ ಜಾಹೀರಾತು ಹಾಕಲು ಅವಕಾಶ ನೀಡಲಾಗಿದೆ.
ಜಾಹೀರಾತು ಗುತ್ತಿಗೆಗಾಗಿ BMRCL 25 ಕೋಟಿ ರೂಪಾಯಿಗಳ ಟೆಂಡರ್ ಹಾಕಿದೆ. ಹಸಿರು ಮಾರ್ಗಕ್ಕೆ 11 ಕೋಟಿ ಮತ್ತು ನೇರಳೆ ಮಾರ್ಗಕ್ಕೆ 14 ಕೋಟಿ ರೂಪಾಯಿ ಮೌಲ್ಯದ ಒಪ್ಪಂದ ಮಾಡಲಾಗಿದೆ. ಮುಂದಿನ 7 ವರ್ಷಗಳವರೆಗೆ ಈ ಜಾಹೀರಾತು ಕಾಣಿಸಲಿದೆ. ಪ್ರತಿ ವರ್ಷ 5% ಜಾಹೀರಾತು ಶುಲ್ಕ ಹೆಚ್ಚಾಗುತ್ತದೆ. ಸಾಮಾಜಿಕ ಸಂದೇಶಗಳನ್ನು ಹೊಂದಿರುವ ಜಾಹೀರಾತುಗಳಿಗಷ್ಟೇ ಅನುಮತಿ ಇದೆ.
ಈ ನಡೆಗೆ ಕೆಲವು ಪ್ರಯಾಣಿಕರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಅವರ ಪ್ರಕಾರ, ಟಿಕೆಟ್ ದರವನ್ನು ಕಡಿಮೆ ಮಾಡಿದರೆ ಹೆಚ್ಚು ಜನರು ಮೆಟ್ರೋ ಬಳಸುತ್ತಾರೆ ಮತ್ತು ಆದಾಯ ಸಹ ಹೆಚ್ಚಾಗಬಹುದು. ಆದಾಯ ಕೊರತೆಯಿಂದಾಗಿ ಬಡ್ಡಿ ತೀರಿಸಲು ಸಮಸ್ಯೆಯಾಗಿರುವುದರಿಂದ ಬಿಎಂಆರ್ಸಿಎಲ್ ಜಾಹೀರಾತು ಮಾರ್ಗವನ್ನೆತ್ತಿದೆಯೆಂದು ಸ್ಪಷ್ಟವಾಗಿದೆ.
