Doha (Qatar): ಭಾರತ ನಡೆಸಿದ ಆಪರೇಷನ್ ಸಿಂಧೂರ್ (Operation Sindoor) ಸ್ಥಗಿತಗೊಂಡದ್ದು, ಅಮೆರಿಕದ ಮಧ್ಯಸ್ಥಿಕೆಯ ಕಾರಣವಲ್ಲದೆ ಭಾರತ–ಪಾಕಿಸ್ತಾನದ ನೇರ ಮಾತುಕತೆಯಿಂದಾಗಿ ಎಂದು ಪಾಕಿಸ್ತಾನ ಈಗ ಮೊದಲ ಬಾರಿಗೆ ಒಪ್ಪಿಕೊಂಡಿದೆ.
ಪಾಕಿಸ್ತಾನದ ಉಪ ಪ್ರಧಾನ ಮತ್ತು ವಿದೇಶಾಂಗ ಸಚಿವ ಇಶಾಕ್ ದಾರ್, “ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ನಮ್ಮ ಸಂಘರ್ಷ ನಿಲ್ಲಿಸಿದವರಂತೆ ಹೇಳಿಕೊಳ್ಳುತ್ತಿದ್ದರೂ, ಅದು ಸತ್ಯವಲ್ಲ. ಭಾರತ ಮೂರನೇ ವ್ಯಕ್ತಿಯ ಮಧ್ಯಸ್ಥಿಕೆಯನ್ನು ಸ್ಪಷ್ಟವಾಗಿ ತಿರಸ್ಕರಿಸಿತ್ತು” ಎಂದು ಹೇಳಿದ್ದಾರೆ.
ಅವರು ವಿವರಿಸಿದಂತೆ, ಭಾರತ ದಾಳಿ ನಂತರ ಪಾಕಿಸ್ತಾನ ಕದನ ವಿರಾಮವನ್ನು ಬಯಸಿತು. ಮೇ 10ರಂದು ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ರುಬಿಯೊ ಮೂಲಕ ಶಾಂತಿ ಪ್ರಸ್ತಾಪ ಬಂದರೂ, ಭಾರತವು “ಇದು ದ್ವಿಪಕ್ಷೀಯ ವಿಷಯ” ಎಂದಷ್ಟೇ ಹೇಳಿತ್ತು.
ಪಾಕಿಸ್ತಾನವು ಅಮೆರಿಕ ಮಧ್ಯಸ್ಥಿಕೆಗೆ ಒಪ್ಪಿದ್ದರೂ, ಭಾರತ ಒಪ್ಪಲಿಲ್ಲ. “ಭಯೋತ್ಪಾದನೆ, ವ್ಯಾಪಾರ, ಆರ್ಥಿಕತೆ, ಜಮ್ಮು–ಕಾಶ್ಮೀರ ಸೇರಿದಂತೆ ಎಲ್ಲ ವಿಷಯಗಳ ಕುರಿತು ಸಮಗ್ರ ಚರ್ಚೆ ಬಯಸಿದ್ದೇವೆ. ಆದರೆ ಭಾರತ ಬಯಸಿದರೆ ಮಾತ್ರ ಸಂವಾದ ಸಾಧ್ಯ” ಎಂದು ದಾರ್ ಹೇಳಿದ್ದಾರೆ.
ಇದರ ವಿರುದ್ಧ, ಅಮೆರಿಕ ಅಧ್ಯಕ್ಷ ಟ್ರಂಪ್ ಮಾತ್ರ ತಮ್ಮ ಮಧ್ಯಸ್ಥಿಕೆಯಿಂದ ಪರಮಾಣು ಯುದ್ಧ ತಪ್ಪಿತು ಎಂದು ಹಲವಾರು ಬಾರಿ ಹೇಳಿಕೊಂಡಿದ್ದರು. ಆದರೆ ಪಾಕಿಸ್ತಾನ ಇದುವರೆಗೆ ಮೌನವಾಗಿದ್ದರೂ, ಇದೀಗ ಮೊದಲ ಬಾರಿಗೆ ಸತ್ಯವನ್ನು ಒಪ್ಪಿಕೊಂಡಿದೆ.
