Karachi, Pakistan: ಅಹ್ಮದ್ ರಾಝಾ ಎಂಬ 19 ವರ್ಷದ ಯುವಕ ಪಾಕಿಸ್ತಾನದಲ್ಲಿ (Pakistan) ಸರ್ಕಾರಿ ದಾಖಲೆಗಳಿಲ್ಲದೆ ಬದುಕು ಸಾಗಿಸುತ್ತಿದ್ದಾನೆ. ಅವನಿಗೆ ಗುರುತಿನ ಚೀಟಿ ಇಲ್ಲ. ಇದರಿಂದಾಗಿ ಅವನು ಶಾಲೆಯಲ್ಲಿ ಓದಲು ಸಾಧ್ಯವಾಗಲಿಲ್ಲ, ಈಗ ಕೆಲಸವೂ ಸಿಗುತ್ತಿಲ್ಲ.
ಪಾಕಿಸ್ತಾನದಲ್ಲಿ ಜನನ ಪ್ರಮಾಣಪತ್ರ ಇಲ್ಲದ ಕಾರಣ ಲಕ್ಷಾಂತರ ಮಕ್ಕಳಿಗೆ ವಿದ್ಯಾಭ್ಯಾಸ, ಉದ್ಯೋಗ, ಆರೋಗ್ಯ ಸೇವೆ ಹಾಗೂ ಇತರ ಹಕ್ಕುಗಳು ಸಿಗುತ್ತಿಲ್ಲ. ಈ ಪ್ರಮಾಣಪತ್ರ ಇಲ್ಲದೆ ರಾಝಾ ಶಾಲೆಯಿಂದ ತಿರಸ್ಕೃತನಾಗಿದ್ದಾನೆ ಮತ್ತು ಕೆಲಸದ ಸ್ಥಳಗಳಲ್ಲಿ ಗುರುತಿನ ಚೀಟಿ ಇಲ್ಲದ ಕಾರಣ ನಿರಾಕರಿಸಲಾಗಿದೆ.
ಅವನ ತಾಯಿ ಮರಿಯಂ ಸುಲೆಮಾನ್ ಕೂಡಾ ಗುರುತಿನ ದಾಖಲೆ ಇಲ್ಲದೆ ಬದುಕುತ್ತಿದ್ದಾರೆ. ಪಾಕಿಸ್ತಾನ ಸರ್ಕಾರ 2000ರಲ್ಲಿ ಬಯೋಮೆಟ್ರಿಕ್ ಗುರುತಿನ ವ್ಯವಸ್ಥೆ ಆರಂಭಿಸಿದರೂ, ಈಗಲೂ ಸುಮಾರು 4.5 ಕೋಟಿ ಜನರು ನೋಂದಾಯಿಸಿಲ್ಲ ಎಂಬ ಅಂದಾಜಿದೆ.
ರಾಝಾ ಗೆ ದಾಖಲೆ ಪಡೆಯಲು ತಾಯಿ ಅಥವಾ ಕುಟುಂಬದ ಸದಸ್ಯರ ದಾಖಲೆಯ ಅಗತ್ಯವಿದೆ. ಆದರೆ, ಇದೊಂದು ದುಬಾರಿ ಮತ್ತು ಕಷ್ಟದ ಪ್ರಕ್ರಿಯೆ. ಕೆಲವೊಮ್ಮೆ ವೈದ್ಯರ ಪ್ರಮಾಣಪತ್ರ, ವಕೀಲರ ಸಹಿ ಅಥವಾ ಪತ್ರಿಕೆಯಲ್ಲಿ ಪ್ರಕಟಣೆ ಬೇಕಾಗುತ್ತದೆ.
ಪಾಕಿಸ್ತಾನದ ಗ್ರಾಮೀಣ ಪ್ರದೇಶಗಳಲ್ಲಿನ ಬಡ ಕುಟುಂಬಗಳಿಗೆ ನೋಂದಣಿ ಮಾಡಿಸುವ ದುಡಿಮೆಯೂ, ಶುಲ್ಕವೂ ಹೊರೆಯಾಗುತ್ತದೆ. ಸರ್ಕಾರದ ಪ್ರಕಾರ ಐದು ವರ್ಷದೊಳಗಿನ ಮಕ್ಕಳಲ್ಲಿ ಶೇ. 58 ರಷ್ಟು ಮಕ್ಕಳಿಗೆ ಜನನ ಪ್ರಮಾಣಪತ್ರವೇ ಇಲ್ಲ.
ಈ ಸಮಸ್ಯೆ ನಿವಾರಣೆಗೆ ಯುನಿಸೆಫ್ ಮನೆ ಮನೆಗೆ ಹೋಗಿ ಜನರ ಜಾಗೃತಿ ಅಭಿಯಾನ ನಡೆಸುತ್ತಿದೆ. ಜನನದ ದಾಖಲೆ ಇಲ್ಲದ ಮಕ್ಕಳಿಗೆ ಬಾಲ ಕಾರ್ಮಿಕತೆ, ಬಲವಂತದ ಮದುವೆ ಇತ್ಯಾದಿ ಅಪಾಯಗಳ ಬಗ್ಗೆ ಪೋಷಕರಿಗೆ ಎಚ್ಚರಿಕೆ ನೀಡಲಾಗುತ್ತಿದೆ.
ನಮ್ಮ ಮಕ್ಕಳ ಭವಿಷ್ಯ ಉಜ್ವಲವಾಗಬೇಕು ಎನ್ನುವ ಆಶಯದಿಂದ ಕೆಲವರು ಈಗ ಮಕ್ಕಳನ್ನು ನೋಂದಾಯಿಸಲು ಪ್ರೇರಿತರಾಗುತ್ತಿದ್ದಾರೆ. 2018 ರಲ್ಲಿ ಶೇ. 6.1 ರಷ್ಟಿದ್ದ ನೋಂದಣಿ ಪ್ರಮಾಣ 2024 ರಲ್ಲಿ ಶೇ. 17.7ಕ್ಕೆ ಏರಿದಿದೆ.
“ಮಗು ಜನಿಸಿದ ಬಳಿಕ ಅದು ಸರ್ಕಾರಕ್ಕೆ ತಿಳಿದಿಲ್ಲದಿದ್ದರೆ, ಅದು ಶಾಲೆ, ಆಸ್ಪತ್ರೆ ಅಥವಾ ಸುರಕ್ಷತೆ ಪಡೆಯಲು ಸಾಧ್ಯವಿಲ್ಲ. ಗುರುತಿನ ದಾಖಲೆ ಇಲ್ಲದಿದ್ದರೆ, ಸರ್ಕಾರದ ದೃಷ್ಟಿಯಲ್ಲಿ ಆ ಮಗು ಅಸ್ತಿತ್ವದಲ್ಲಿಲ್ಲ ಎಂದು ಅರ್ಥ,” ಎಂದು ಯುನಿಸೆಫ್ ಅಧಿಕಾರಿ ಜಹಿದಾ ಮಂಜೂರ್ ಹೇಳಿದ್ದಾರೆ.
ಖೈಬರ್ ಪಖ್ತುಂಖ್ವಾ ಪ್ರದೇಶದಲ್ಲಿಯೂ ಈ ಸಮಸ್ಯೆ ಇದೆ. ಹಲವರು ದಾಖಲೆಗಳಿಲ್ಲದೆ ತೀರ್ಥಯಾತ್ರೆ ವೀಸಾ ಕೂಡ ಪಡೆಯಲಾಗದೆ ಪರದಾಡುತ್ತಿದ್ದಾರೆ.
ಇದು ಪಾಕಿಸ್ತಾನದಲ್ಲಿ ಲಕ್ಷಾಂತರ ಮಕ್ಕಳ ಅಸ್ತಿತ್ವವಿಲ್ಲದಂತೆಯಾದ ನೋವಿನ ಕಥೆಯಾಗಿದೆ.
