ರೇಣುಕಾ ಸ್ವಾಮಿ ಕೊಲೆ ಪ್ರಕರಣದಲ್ಲಿ ಆರೋಪಿಯಾಗಿರುವ ನಟ ದರ್ಶನ್ ಮತ್ತು ಪವಿತ್ರಾ ಗೌಡ ಅವರ ಜಾಮೀನು ರದ್ದುಗೊಳಿಸಲು ರಾಜ್ಯ ಸರ್ಕಾರ ಸುಪ್ರೀಂಕೋರ್ಟ್ಗೆ (Supreme Court) ಅರ್ಜಿ ಸಲ್ಲಿಸಿದ್ದು, ಈ ಅರ್ಜಿಯ ವಿಚಾರಣೆ ನಡೆಯುತ್ತಿದೆ.
ಇದುವರೆಗೆ, ಸುಪ್ರೀಂಕೋರ್ಟ್ ಹೇಳಿದಂತೆ, ಕರ್ನಾಟಕ ಹೈಕೋರ್ಟ್ ಜಾಮೀನು ನೀಡುವಾಗ ಸರಿಯಾದ ನಿಯಮಗಳನ್ನು ಪಾಲಿಸಿಲ್ಲ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ. ಇದರ ಬೆನ್ನಲ್ಲೇ ದರ್ಶನ್ ಮತ್ತು ಪವಿತ್ರಾ ಅವರಿಗೆ ಮತ್ತೆ ಜೈಲಿಗೆ ಹೋಗುವ ಆತಂಕ ಎದುರಾಗಿದೆ.
ಈ ಹಿನ್ನೆಲೆಯಲ್ಲಿ, ದರ್ಶನ್ ಪರದ ವಕೀಲರು, ಜಾಮೀನು ರದ್ದುಪಡಿಸಬಾರದೆಂದು ಹಲವಾರು ಲಿಖಿತ ಕಾರಣಗಳನ್ನು ಸುಪ್ರೀಂಕೋರ್ಟ್ಗೆ ನೀಡಿದ್ದಾರೆ.
ಬಂಧನದ ವಿಧಾನದ ಮೇಲೆ ಪ್ರಶ್ನೆ: ದರ್ಶನ್ ಅವರನ್ನು ಮೈಸೂರುದಲ್ಲಿ ಬಂಧಿಸಲಾಗಿದೆ ಆದರೆ FIR ಬೆಂಗಳೂರಿನಲ್ಲಿ ದಾಖಲಾಗಿತ್ತು. ಬಂಧನೆಯ ಕಾರಣವನ್ನು ಸಂಜೆ 6:30ರವರೆಗೂ ಲಿಖಿತವಾಗಿ ನೀಡಲಾಗಿಲ್ಲ, ಇದು ಕಾನೂನು ಉಲ್ಲಂಘನೆಯಾಗುತ್ತದೆ ಎಂದು ವಕೀಲರು ಹೇಳಿದ್ದಾರೆ.
ಜಾಮೀನು ಷರತ್ತು ಉಲ್ಲಂಘನೆ ಇಲ್ಲ: ದರ್ಶನ್ ಅವರು ಜಾಮೀನು ಪಡೆದ ಬಳಿಕ ಯಾವುದೇ ಷರತ್ತು ಉಲ್ಲಂಘಿಸಿದ್ದಾರೆ ಎಂಬುದಕ್ಕೆ ಸಾಕ್ಷ್ಯವಿಲ್ಲ. ಅಪಹರಣ ಅಥವಾ ಕೊಲೆ ಬಗ್ಗೆ ದರ್ಶನ್ ಸೂಚನೆ ನೀಡಿದರೆಂಬ ಪುರಾವೆಯೂ ಇಲ್ಲ.
ಸಾಕ್ಷಿಗಳ ವಿಶ್ವಾಸಾರ್ಹತೆ ಪ್ರಶ್ನಾರ್ಥಕ: ಕಿರಣ್ ಅವರ ಹೇಳಿಕೆ ಘಟನೆ ನಡೆದ 7 ದಿನಗಳ ನಂತರ ಮಾತ್ರ ದಾಖಲಾಗಿದೆ. ಮಲ್ಲಿಕಾರ್ಜುನ್ ಮತ್ತು ನರೇಂದ್ರ ಸಿಂಗ್ ಅವರು ಕೋರ್ಟ್ನಲ್ಲಿ ದರ್ಶನ್ ಹೆಸರನ್ನು ಉಲ್ಲೇಖಿಸಿಲ್ಲ.
ವೀಡಿಯೊ ಸಾಕ್ಷ್ಯವಿಲ್ಲ: ರಾಜ್ಯ ಸರ್ಕಾರ 3 ಸೆಕೆಂಡಿನ ವೀಡಿಯೊವಿದೆ ಎಂದು ಹೇಳಿದ್ದರೂ, ಅದು ಚಾರ್ಜ್ಶೀಟ್ನಲ್ಲಿ ಇಲ್ಲ. ಹೀಗಾಗಿ ಸರ್ಕಾರದ ವಾದದಲ್ಲಿ ಸತ್ಯಾಸತ್ಯತೆ ಇಲ್ಲವೆಂದು ವಕೀಲರು ಹೇಳಿದ್ದಾರೆ.
ಮರಣದ ಸಮಯದ ಕುರಿತು ಸಂಶಯ: ಪ್ರಾಸಿಕ್ಯೂಷನ್ ಕತೆಗೂ ಅನುಗುಣವಾಗಿ ಮರಣದ ಸಮಯ ನಿರ್ಧರಿಸಲಾಗಿದೆ ಎಂದು ಅವರು ಆರೋಪಿಸಿದ್ದಾರೆ.
ಈ ಎಲ್ಲಾ ಅಂಶಗಳನ್ನು ಆಧರಿಸಿ, ದರ್ಶನ್ ಪರದ ವಕೀಲರು ಸುಪ್ರೀಂಕೋರ್ಟ್ನ್ನು ಜಾಮೀನು ರದ್ದುಮಾಡಬಾರದೆಂದು ಮನವಿ ಮಾಡಿದ್ದಾರೆ.
