Hyderabad: ತೆಲಂಗಾಣ ಮುಖ್ಯಮಂತ್ರಿ ರೇವಂತ್ ರೆಡ್ಡಿ (Revanth Reddy) ಅವರು, ಸರ್ಕಾರದ ಖಜಾನೆ ಖಾಲಿಯಾಗಿದ್ದು, ಬಡವರಿಗೆ ಹಂಚಲು ಭೂಮಿ ಇಲ್ಲ ಎಂದು ಹೇಳಿದ್ದಾರೆ.
ಉಸ್ಮಾನಿಯಾ ವಿಶ್ವವಿದ್ಯಾಲಯದಲ್ಲಿ ಹೊಸ ಹಾಸ್ಟೆಲ್ ಉದ್ಘಾಟಿಸಿ ಮಾತನಾಡಿದ ಅವರು, ವಿದ್ಯಾರ್ಥಿಗಳು ಶಿಕ್ಷಣವನ್ನು ನಿರ್ಲಕ್ಷಿಸಬಾರದು ಎಂದು ತಿಳಿಸಿದರು. “ನಿಮಗೆ ಉತ್ತಮ ಜೀವನ ಕೊಡಬೇಕೆಂಬ ಆಸೆ ನನಗಿದೆ. ಆದರೆ ಭೂಮಿ ನೀಡಲು ಸಾಧ್ಯವಿಲ್ಲ, ಶಿಕ್ಷಣವೇ ನಿಮ್ಮ ಭವಿಷ್ಯಕ್ಕೆ ಆಸ್ತಿ” ಎಂದರು.
ತೆಲಂಗಾಣದಲ್ಲಿ 1.5 ಕೋಟಿ ಎಕರೆ ಕೃಷಿ ಭೂಮಿ ಇದ್ದರೂ, ಶೇ. 96ರಷ್ಟು ಸಣ್ಣ ರೈತರು ಕೇವಲ 1–3 ಎಕರೆ ಭೂಮಿಯನ್ನೇ ಹೊಂದಿದ್ದಾರೆ ಎಂದು ಹೇಳಿದರು. ಭೂ ಮಿತಿ ಕಾಯ್ದೆ ತಂದರೂ ಹೆಚ್ಚುವರಿ ಭೂಮಿಯನ್ನು ಕೊಡುವುದು ಸಾಧ್ಯವಿಲ್ಲ ಎಂದರು.
ಮೇ ತಿಂಗಳಿನಿಂದ ರಾಜ್ಯದ ಆರ್ಥಿಕತೆ ನಿಧಾನಗತಿಯಲ್ಲಿ ಸಾಗುತ್ತಿದೆ. ಆದರೆ ಕಳೆದ 20 ತಿಂಗಳಲ್ಲಿ ಖಾಸಗಿ ವಲಯದಲ್ಲಿ 1.5 ಲಕ್ಷ ಜನರಿಗೆ ಉದ್ಯೋಗ ಸಿಕ್ಕಿದೆ ಎಂದು ವಿವರಿಸಿದರು.
ಕೇಂದ್ರ ಸರ್ಕಾರ ತೆಲಂಗಾಣವನ್ನು ಆದಾಯ, ಕಾನೂನು-ಸುವ್ಯವಸ್ಥೆ ಹಾಗೂ ಪೊಲೀಸ್ ವ್ಯವಸ್ಥೆಯಲ್ಲಿ ಮುಂಚೂಣಿಯಲ್ಲಿದೆ ಎಂದು ಗುರುತಿಸಿದೆ ಎಂದರು.
100 ವರ್ಷದ ಉಸ್ಮಾನಿಯಾ ವಿಶ್ವವಿದ್ಯಾಲಯವನ್ನು ವಿಶ್ವದರ್ಜೆಯ ಸಂಸ್ಥೆಯನ್ನಾಗಿ ಪರಿವರ್ತಿಸುತ್ತೇವೆ ಎಂದು ಭರವಸೆ ನೀಡಿದರು. ಇದಕ್ಕಾಗಿ ತಾಂತ್ರಿಕ ಸಮಿತಿ ರಚಿಸಿ ಮೂಲಸೌಕರ್ಯದ ಮೌಲ್ಯಮಾಪನ ಹಾಗೂ ಅಭಿವೃದ್ಧಿ ಯೋಜನೆ ತಯಾರಿಸಲು ಸೂಚನೆ ನೀಡಿದರು.
2021ರಲ್ಲಿ ತೆಲಂಗಾಣ ಚಳುವಳಿಯ ನಂತರ, ಉಸ್ಮಾನಿಯಾ ಆವರಣದಲ್ಲಿ ವಿದ್ಯಾರ್ಥಿಗಳನ್ನು ಉದ್ದೇಶಿಸಿ ಮಾತನಾಡಿದ ಮೊದಲ ಮುಖ್ಯಮಂತ್ರಿ ರೇವಂತ್ ರೆಡ್ಡಿ. 2018ರಲ್ಲಿ ಕೆ.ಚಂದ್ರಶೇಖರ್ ರಾವ್ ಭಾಗವಹಿಸಿದ್ದರೂ, ಪ್ರತಿಭಟನೆಯ ಕಾರಣದಿಂದ ಅವರು ಭಾಷಣ ಮಾಡಿರಲಿಲ್ಲ.
