New Delhi: ಭಾರತವು ಕ್ಷಿಪಣಿ (Missile) ತಯಾರಿಕೆಯಲ್ಲಿ ವೇಗವಾಗಿ ಮುನ್ನಡೆಯುತ್ತಿದೆ. ಮೊದಲು ಒಂದು ಮಿಸೈಲ್ ತಯಾರಿಕೆಗೆ 10-12 ವರ್ಷ ಬೇಕಾಗುತ್ತಿದ್ದರೆ, ಈಗ ಅದು ಕೇವಲ 2-3 ವರ್ಷಗಳಲ್ಲೇ ಸಾಧ್ಯವಾಗಿದೆ. ಈ ಬಗ್ಗೆ ಡಿಆರ್ಡಿಒ (DRDO) ಮಾಜಿ ಅಧ್ಯಕ್ಷ ಮತ್ತು ಭಾರತೀಯ ಏರೋನಾಟಿಕಲ್ ಸೊಸೈಟಿಯ ಅಧ್ಯಕ್ಷರಾದ ಜಿ. ಸತೀಶ್ ರೆಡ್ಡಿ ಮಾಹಿತಿ ನೀಡಿದ್ದಾರೆ.
ಅಮೆರಿಕಾ, ಚೀನಾ ಮತ್ತು ರಷ್ಯಾ ದೇಶಗಳಷ್ಟೇ ಇಷ್ಟು ಕಡಿಮೆ ಸಮಯದಲ್ಲಿ ಮಿಸೈಲ್ ತಯಾರಿಸುವ ಸಾಮರ್ಥ್ಯ ಹೊಂದಿವೆ. ಇತ್ತೀಚೆಗೆ ಭಾರತ ಕೂಡ ಈ ಮಟ್ಟಕ್ಕೆ ಬೆಳೆದಿದ್ದು ಹೆಮ್ಮೆಯ ಸಂಗತಿ. ಇದು ಭಾರತ ತನ್ನ ತಂತ್ರಜ್ಞಾನದಲ್ಲಿಯೂ, ಸ್ವಾವಲಂಬನೆ ಯತ್ನದಲ್ಲಿಯೂ ಭಾರೀ ಸಾಧನೆ ಮಾಡುತ್ತಿರುವುದನ್ನು ತೋರಿಸುತ್ತದೆ ಎಂದು ರೆಡ್ಡಿ ತಿಳಿಸಿದ್ದಾರೆ.
DRDO ಭಾರತದಲ್ಲಿ ಅಗ್ನಿ, ಬ್ರಹ್ಮೋಸ್, ಅಸ್ತ್ರ, ರುದ್ರಂ, ಆಕಾಶ್ ಮುಂತಾದ ಹಲವಾರು ಮಿಸೈಲ್ಗಳನ್ನು ಅಭಿವೃದ್ಧಿಪಡಿಸುತ್ತಿದೆ. ಇವುಗಳನ್ನು ತಯಾರಿಸಲು ಎಚ್ಎಎಲ್, ಭಾರತ್ ಡೈನಾಮಿಕ್ಸ್, ಟಾಟಾ ಅಡ್ವಾನ್ಸ್ಡ್ ಸಿಸ್ಟಮ್ಸ್, ಎಲ್ & ಟಿ ಮುಂತಾದ ಸಂಸ್ಥೆಗಳು ಸಹಕರಿಸುತ್ತಿವೆ. ಖಾಸಗಿ ಕಂಪನಿಗಳ ಪಾಲ್ಗೊಳ್ಳುವಿಕೆಯಿಂದ ಮಿಸೈಲ್ ತಯಾರಿಕೆ ಹೆಚ್ಚು ವೇಗವಾಗುತ್ತಿದೆ.
ಇದು ಭಾರತೀಯ ರಕ್ಷಣಾ ತಂತ್ರಜ್ಞಾನದಲ್ಲಿ ಹೊಸ ಯುಗದ ಆರಂಭವೆಂದೇ ಕಾಣಬಹುದು.
