New Delhi: ವೈದ್ಯಕೀಯ ಕೋರ್ಸ್ ಮುಗಿದ ಬಳಿಕ ಗ್ರಾಮೀಣ ಪ್ರದೇಶಗಳಲ್ಲಿ ಸೇವೆ ಸಲ್ಲಿಸುವುದನ್ನು (Rural service) ಕಡ್ಡಾಯಗೊಳಿಸಿರುವ ರಾಜ್ಯ ಸರ್ಕಾರಗಳ ಸೇವಾ ಬಾಂಡ್ ಕ್ರಮದ ಕುರಿತು ಸುಪ್ರೀಂ ಕೋರ್ಟ್ (Supreme Court) ಅಸಮಾಧಾನ ವ್ಯಕ್ತಪಡಿಸಿದೆ. ಇದನ್ನು ಬಲವಂತದ ದುಡಿಮೆಯಂತೆ ಪರಿಗಣಿಸಿ, ವಿದ್ಯಾರ್ಥಿಗಳನ್ನು ಜೀತದಾಳುಗಳಂತೆ ನಡೆಸಿಕೊಳ್ಳಲು ಸಾಧ್ಯವಿಲ್ಲ ಎಂದು ತೀರ್ಪು ನೀಡಿದೆ.
ಅಖಿಲ ಭಾರತ ಕೋಟಾದ ಮೂಲಕ ರಾಜ್ಯ ವೈದ್ಯಕೀಯ ಕಾಲೇಜುಗಳಿಗೆ ಸೇರುವ ವಿದ್ಯಾರ್ಥಿಗಳು ಸಬ್ಸಿಡಿ ಶುಲ್ಕದ ಬದಲಿಗೆ ಗ್ರಾಮೀಣ ಸೇವೆಗೆ ಬಾಂಡ್ ಸಹಿ ಮಾಡಬೇಕಾಗುತ್ತದೆ. ಈ ಸೇವೆ ಸಲ್ಲಿಸಿದರೆ ಅವರಿಗೆ ಕಡಿಮೆ ಶುಲ್ಕದಲ್ಲಿ ಶಿಕ್ಷಣ ದೊರಕುತ್ತದೆ. ಆದರೆ, ಸೇವೆ ಸಲ್ಲಿಸಲು ತಯಾರಿಲ್ಲದವರು ಹೆಚ್ಚಿನ ಶುಲ್ಕ ಪಾವತಿಸಬೇಕಾಗುತ್ತದೆ ಅಥವಾ 30 ಲಕ್ಷ ರೂ. ಹಣ ನೀಡಿ ಬಾಂಡ್‌ನಿಂದ ಮುಕ್ತರಾಗಬಹುದು.
2011ನೇ ಸಾಲಿನ ಗರ್ವಾಲ್ ಕಾಲೇಜಿನ ವಿದ್ಯಾರ್ಥಿಗಳು ಈ ಬಾಂಡ್‌ನಿಂದ ಹೊರಗುಳಿದ ಕಾರಣ, ಹೈಕೋರ್ಟ್ ಅವರಿಗೆ ಶೇಕಡಾ 18ರಷ್ಟು ಬಡ್ಡಿಯೊಂದಿಗೆ ಹೆಚ್ಚುವರಿ ಶುಲ್ಕ ಪಾವತಿ ಮಾಡಲು ಆದೇಶಿಸಿತ್ತು. ಈ ಆದೇಶ ಪ್ರಶ್ನಿಸಿ ವೈದ್ಯ ವಿದ್ಯಾರ್ಥಿಗಳು ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿದ್ದರು. ವಿಚಾರಣೆ ನಡೆಸಿದ ಪೀಠ, ಬಡ್ಡಿದರವನ್ನು ಶೇಕಡಾ 9ಕ್ಕೆ ಇಳಿಸಿ, ಪಾವತಿಸಲು ನಾಲ್ಕು ವಾರಗಳ ಕಾಲಾವಕಾಶ ನೀಡಿದೆ.
ಅಲ್ಲದೇ, ಮೂಲತಃ ಆ ರಾಜ್ಯದವರೇ ಅಲ್ಲದ ವಿದ್ಯಾರ್ಥಿಗಳು ಕಡ್ಡಾಯವಾಗಿ ಗ್ರಾಮೀಣ ಪ್ರದೇಶಗಳಲ್ಲಿ ಸೇವೆ ಸಲ್ಲಿಸಲು ಹೇಗೆ ಸಾಧ್ಯ? ದೂರದ ಪ್ರದೇಶದ ರೋಗಿಗಳು ವಿಭಿನ್ನ ಭಾಷೆಯ ವೈದ್ಯರೊಂದಿಗೆ ಹೇಗೆ ಸಂವಹನ ಮಾಡುತ್ತಾರೆ? ಎಂಬ ಪ್ರಶ್ನೆಗಳನ್ನು ಕೋರ್ಟ್ ಮುಂದಿಟ್ಟಿದೆ.
ತೀರ್ಪಿನ ಪ್ರಮುಖ ಅಂಶಗಳು
- ಅಖಿಲ ಭಾರತ ಕೋಟಾ ವಿದ್ಯಾರ್ಥಿಗಳನ್ನು ಜೀತದಾಳುಗಳಂತೆ ನೋಡಲು ಸಾಧ್ಯವಿಲ್ಲ.
- ಗ್ರಾಮೀಣ ಸೇವೆ ಕಡ್ಡಾಯ ಮಾಡುವುದು ತಾತ್ವಿಕವಾಗಿ ಸರಿಯಲ್ಲ.
- ಬಡ್ಡಿದರವನ್ನು ಶೇಕಡಾ 18ರಿಂದ ಶೇಕಡಾ 9ಕ್ಕೆ ಇಳಿಸಿ, ಪಾವತಿಸಲು ಕಾಲಾವಕಾಶ ನೀಡಲಾಗಿದೆ.
- ವಿದ್ಯಾರ್ಥಿಗಳ ಮೇಲೆ ಲಕ್ಷಾಂತರ ರೂಪಾಯಿಗಳ ದಂಡ ವಿಧಿಸುವುದು ನ್ಯಾಯೋಚಿತವಲ್ಲ.
- ಈ ತೀರ್ಪಿನಿಂದ ರಾಜ್ಯ ಸರ್ಕಾರಗಳ ಸೇವಾ ಬಾಂಡ್ ನೀತಿ ಕುರಿತು ಹೊಸ ಚರ್ಚೆ ಶುರುವಾಗಿದೆ.
