Tel Aviv/Tehran: ಇಸ್ರೇಲ್ (Israel) ಮತ್ತು ಇರಾನ್ ನಡುವಿನ ಸಂಘರ್ಷ ಗರಿಷ್ಠ ಮಟ್ಟಕ್ಕೆ ತಲುಪಿದೆ. ಇಸ್ರೇಲ್ ಸೇನೆ ಇರಾನ್‌ನ ತೈಲ ಶುದ್ಧೀಕರಣ ಘಟಕದ ಮೇಲೆ ಬಾಂಬ್ ಎಸೆದು ಭಾರಿ ಹಾನಿ ಉಂಟುಮಾಡಿದೆ. ಇಸ್ರೇಲ್ ಗುಪ್ತಚರದಳ ಇರಾನ್‌ನ ಪ್ರಮುಖ ನಾಯಕರನ್ನು ಗುರಿ ಮಾಡಿ ಹೊಡೆದು ಹಾಕಿದೆ.
ಇದಕ್ಕೆ ಪ್ರತಿಯಾಗಿ ಇರಾನ್ ಕೂಡ ಇಸ್ರೇಲ್ ಮೇಲೆ ಹಗಲು-ರಾತ್ರಿ ಕ್ಷಿಪಣಿಗಳ ದಾಳಿ ನಡೆಸುತ್ತಿದೆ. ಈ ದಾಳಿಗಳಿಂದ ಇಸ್ರೇಲ್‌ನ ಟೆಲ್ ಅವೀವ್ ನಗರದಲ್ಲಿ ಸಾವು-ನೋವುಗಳು ಹೆಚ್ಚಾಗಿವೆ. ಇಸ್ರೇಲ್‌ನ ರಕ್ಷಣಾ ವ್ಯವಸ್ಥೆಯಾದ “ಐರನ್ ಡೋಮ್” ಭೇದಿತವಾಗಿದೆ.
ಭಾನುವಾರ ಇಸ್ರೇಲ್ ಇರಾನ್‌ನ ತೈಲಾಗಾರವನ್ನು ಗುರಿ ಮಾಡಿದ್ದು, ಇದರಿಂದ ತೈಲ ಉತ್ಪಾದನೆ ಹಾಗೂ ಸಾಗಣೆ ಮೇಲೆ ಭಾರಿ ಪರಿಣಾಮ ಬೀರುತ್ತದೆ. ಇರಾನ್ ಜಗತ್ತಿಗೆ ಶೇಕಡಾ 6.5ರಷ್ಟು ತೈಲವನ್ನು ಪೂರೈಸುತ್ತಿದೆ. ಈ ಘಟನೆಯಿಂದ ತೈಲ ಬೆಲೆ ಏರಿಕೆ ಮತ್ತು ಪೂರೈಕೆ ಬಿಕ್ಕಟ್ಟು ಉಂಟಾಗಬಹುದು.
ಇಸ್ರೇಲ್‌ಗೆ ಅಮೆರಿಕ ಬೆಂಬಲ ನೀಡುತ್ತಿದೆ ಎಂದು ಆರೋಪಿಸಿರುವ ಇರಾನ್, ಅಮೆರಿಕದ ಟೆಲ್ ಅವೀವ್‌ನ ರಾಯಭಾರಿ ಕಚೇರಿಗೂ ದಾಳಿ ನಡೆಸಿದೆ. ಕ್ಷಿಪಣಿಯೊಂದು ಕಚೇರಿಗೆ ಅಪ್ಪಳಿಸಿದ್ದು, ಸಣ್ಣ ಪುಟ್ಟ ಹಾನಿಯಾಗಿದೆ. ಯಾವುದೇ ವ್ಯಕ್ತಿಗೆ ಗಾಯವಾಗಿಲ್ಲ ಎಂದು ಅಮೆರಿಕದ ರಾಯಭಾರಿ ಮೈಕ್ ಹಕಬಿ ತಿಳಿಸಿದ್ದಾರೆ.
ಇರಾನ್ ಆರೋಗ್ಯ ಸಚಿವಾಲಯದ ಪ್ರಕಾರ, ಇಸ್ರೇಲ್ ದಾಳಿಯಿಂದ 22 ಜನರು ಮೃತಪಟ್ಟಿದ್ದಾರೆ. ಆದರೆ ಇಸ್ರೇಲ್ ಮೂಲಗಳು ಇದನ್ನು 500ಕ್ಕೂ ಹೆಚ್ಚು ಎನ್ನುತ್ತಿವೆ. 1,200ಕ್ಕೂ ಹೆಚ್ಚು ಜನ ಗಾಯಗೊಂಡಿದ್ದಾರೆ. ಶೇಕಡಾ 90% ಸಾವುಗಳು ನಾಗರಿಕರದ್ದು ಎಂಬುದು ಇರಾನ್ ವಕ್ತಾರರು ತಿಳಿಸಿದ್ದಾರೆ.
ಇಸ್ರೇಲ್‌ನಲ್ಲೂ 15 ಮಂದಿ ಸಾವಿಗೀಡಾಗಿದ್ದು, 390 ಜನ ಗಾಯಗೊಂಡಿದ್ದಾರೆ. 7 ಮಂದಿ ನಾಪತ್ತೆಯಾಗಿದ್ದಾರೆ.
ಇಸ್ರೇಲ್, ಇರಾನ್ ನಾಯಕ ಅಯತೊಲ್ಲಾ ಅಲಿ ಖಮೇನಿ ಅವರನ್ನು ಕೊಲ್ಲಲು ಯೋಜನೆ ರೂಪಿಸಿದ್ದು, ಇದನ್ನು ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್‌ಗೆ ತಿಳಿಸಲಾಗಿದೆ. ಆದರೆ ಟ್ರಂಪ್ ಇದಕ್ಕೆ ಒಪ್ಪಿಗೆ ನೀಡಿಲ್ಲ. ಖಮೇನಿಯ ಹತ್ಯೆಯಿಂದ ಯುದ್ಧ ಮತ್ತಷ್ಟು ತೀವ್ರಗೊಳ್ಳಬಹುದೆಂದು ಅವರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
