Bengaluru: ಕಲಬುರಗಿ ಸೇರಿದಂತೆ ರಾಜ್ಯದ 6 ವಿಮಾನ ನಿಲ್ದಾಣಗಳಿಗೆ ಹೆಚ್ಚುವರಿ ವಿಮಾನಯಾನ ಸೇವೆ ಕಲ್ಪಿಸಲು ಮೂಲಸೌಕರ್ಯ ಅಭಿವೃದ್ಧಿ ಸಚಿವ ಎಂ.ಬಿ. ಪಾಟೀಲ್ ಅವರು ಮಂಗಳವಾರ ವಿವಿಧ ವಿಮಾನಯಾನ ಸಂಸ್ಥೆಗಳ ಪ್ರತಿನಿಧಿಗಳೊಂದಿಗೆ ಸಭೆ ನಡೆಸಿದರು.
ಸಭೆಯಲ್ಲಿ ಐಟಿ-ಬಿಟಿ ಸಚಿವ ಪ್ರಿಯಾಂಕ್ ಖರ್ಗೆಯವರು ಕೂಡ ಭಾಗವಹಿಸಿ ಮೈಸೂರು, ಬೀದರ್, ಹುಬ್ಬಳ್ಳಿ, ಬೆಳಗಾವಿ, ವಿದ್ಯಾನಗರ ಮತ್ತು ಹೊಸದಾಗಿ ತೆರೆಗೊಳ್ಳಲಿರುವ ವಿಜಯಪುರ ವಿಮಾನ ನಿಲ್ದಾಣಗಳ ಅಭಿವೃದ್ಧಿ ಕುರಿತು ಚರ್ಚೆ ನಡೆಯಿತು.
ಪ್ರಮುಖ ಸಲಹೆಗಳು ಮತ್ತು ನಿರ್ಧಾರಗಳು
- ವಿಮಾನ ಸಂಪರ್ಕ ಹೆಚ್ಚಳ: ಬೆಂಗಳೂರಿನಿಂದ ಕಲಬುರಗಿಗೆ ಸದ್ಯದ ಪರಿಸ್ಥಿತಿಯಲ್ಲಿ ವಾರಕ್ಕೆ ಕೇವಲ ಮೂರು ದಿನಗಳ ವಿಮಾನಸೇವೆ ಇದೆ. ಇದನ್ನು ಹೆಚ್ಚಿಸಬೇಕು ಹಾಗೂ ಇತರ ರಾಜ್ಯಗಳ ನಗರಗಳಿಗೆ ಸಂಪರ್ಕ ಕಲ್ಪಿಸಬೇಕು ಎಂಬ ಬೇಡಿಕೆ ವ್ಯಕ್ತವಾಯಿತು.
- ಎಂಆರ್‌ಒ ಕೇಂದ್ರಗಳು: ಈ ವಿಮಾನ ನಿಲ್ದಾಣಗಳನ್ನು ವಿಮಾನಗಳ ನಿರ್ವಹಣೆ ಮತ್ತು ದುರಸ್ತಿ ಕೇಂದ್ರಗಳಾಗಿಯೂ ಬಳಸಬಹುದು ಎಂಬ ಸೂಚನೆ ನೀಡಲಾಯಿತು.
- ಮೈಸೂರು, ಬೀದರ್, ವಿದ್ಯಾನಗರ ಸೇವೆಗಳ ಮೆರುಗು: ಕೆಲ ವಿಮಾನ ನಿಲ್ದಾಣಗಳಲ್ಲಿ ವಿಮಾನ ಸಂಚಾರ ಕಡಿಮೆಯಾಗಿದ್ದು, ಅವುಗಳನ್ನು ಹೆಚ್ಚು ಬಳಸುವ ಪ್ರಸ್ತಾವನೆ ಕೇಳಿಬಂದಿತು.
- ವಿದೇಶಿ ಪ್ರಯಾಣಿಕರ ಬಗ್ಗೆ ಗಮನ: ಜಿಂದಾಲ್ ಟೌನ್‌ಶಿಪ್ ನಿಂದ ವಿದೇಶಿ ಪ್ರಯಾಣಿಕರ ಸಂಖ್ಯೆ ಹೆಚ್ಚಾಗುತ್ತಿರುವ ಹಿನ್ನೆಲೆ, ಹೈದರಾಬಾದ್ ಹಾಗೂ ಬೆಂಗಳೂರು ಮಾರ್ಗದಲ್ಲಿ ಸೇವೆ ಆರಂಭಿಸುವ ಮಾತು ಕೇಳಿಬಂತು.
- ವಿಜಯಪುರ ವಿಮಾನ ನಿಲ್ದಾಣ ಪ್ರಾರಂಭಕ್ಕೆ ಸಿದ್ಧತೆ: ಪರಿಸರ ಇಲಾಖೆಯಿಂದ ಅನುಮತಿ ಸಿಗುತ್ತಿದ್ದಂತೆಯೇ ವಿಮಾನಯಾನ ಆರಂಭಿಸಲು ಸೂಚನೆ ನೀಡಲಾಗಿದೆ.
- ಬೀದರ್–ಬೆಂಗಳೂರು ಸೇವೆ ಪುನಾರಂಭ: ಸ್ಟಾರ್ ಎರ್ ಸಂಸ್ಥೆ ಏಪ್ರಿಲ್ 15ರಿಂದ ಈ ಮಾರ್ಗದ ಸೇವೆಯನ್ನು ಮರುಪ್ರಾರಂಭಿಸಲಿದೆ.
ಹುಬ್ಬಳ್ಳಿ ಹಾಗೂ ಬೆಳಗಾವಿ ಅಂತಾರಾಷ್ಟ್ರೀಯ ಮಟ್ಟಕ್ಕೆ
ಸಚಿವ ಎಂ.ಬಿ. ಪಾಟೀಲ್ ಅವರು ಹುಬ್ಬಳ್ಳಿ ಮತ್ತು ಬೆಳಗಾವಿ ವಿಮಾನ ನಿಲ್ದಾಣಗಳನ್ನು ಅಂತರಾಷ್ಟ್ರೀಯ ಮಟ್ಟಕ್ಕೆ ಏರಿಸಲು ಕೇಂದ್ರ ಸರ್ಕಾರಕ್ಕೆ ಪತ್ರ ಬರೆಯುವಂತೆ ಅಧಿಕಾರಿಗಳಿಗೆ ಸೂಚಿಸಿದರು. ಈ ಪ್ರದೇಶದಿಂದ ವಿದೇಶ ಪ್ರಯಾಣ ಮಾಡಲು ನಾಗರಿಕರು ಈಗ ಗೋವಾ ಹೋಗಬೇಕಾಗುತ್ತದೆ. ಆದ್ದರಿಂದ ಈ ನಿಲ್ದಾಣಗಳೇ ಅಂತರಾಷ್ಟ್ರೀಯ ನಿಲ್ದಾಣಗಳಾಗಿ ಅಭಿವೃದ್ಧಿಯಾಗಬೇಕು ಎಂದು ಅವರು ಹೇಳಿದರು.
