2025ರ ಚಾಂಪಿಯನ್ಸ್ ಟ್ರೋಫಿ (Champions Trophy) ಆಯೋಜನೆಯಿಂದ ಪಾಕಿಸ್ತಾನ ಕ್ರಿಕೆಟ್ ಮಂಡಳಿ (PCB-Pakistan Cricket Board) ಭಾರೀ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದೆ. ಕ್ರೀಡಾಂಗಣ ನವೀಕರಣ ವೆಚ್ಚ ಹೆಚ್ಚಳ ಮತ್ತು ಕಡಿಮೆ ಆದಾಯದಿಂದಾಗಿ ಪಿಸಿಬಿ 700 ಕೋಟಿ ರೂ. ನಷ್ಟ ಅನುಭವಿಸಿದೆ.
ಟೂರ್ನಿಗೆ ಮುನ್ನ, ಪಿಸಿಬಿ ₹500 ಕೋಟಿ ವೆಚ್ಚದಲ್ಲಿ ಮೂರು ಕ್ರೀಡಾಂಗಣಗಳನ್ನು ನವೀಕರಿಸಿತ್ತು. ಆದರೆ, ನವೀಕರಣದ ವೆಚ್ಚ ನಿರೀಕ್ಷಿತ ಬಜೆಟ್ ಗಿಂತ ಶೇ.50ರಷ್ಟು ಹೆಚ್ಚಾಗಿತ್ತು. ಟೂರ್ನಿಯ ಸಿದ್ಧತೆಗಾಗಿ ಹೆಚ್ಚುವರಿಯಾಗಿ ₹340 ಕೋಟಿ ವೆಚ್ಚ ಮಾಡಲಾಗಿತ್ತು, ಒಟ್ಟಾರೆ ₹869 ಕೋಟಿಯಷ್ಟು ಖರ್ಚು ಮಾಡಲಾಗಿದೆ. ಆದರೆ, ಪಾಕಿಸ್ತಾನ ಟಿಕೆಟ್ ಹಾಗೂ ಇನ್ನಿತರ ಮೂಲಗಳಿಂದ ಕೇವಲ ₹52 ಕೋಟಿ ರೂ. ಮಾತ್ರ ಗಳಿಸಿತು, ಇದರಿಂದ ಶೇ.85ರಷ್ಟು ನಷ್ಟವನ್ನು ಅನುಭವಿಸಿತು.
ಈ ಆರ್ಥಿಕ ಕಷ್ಟದ ಪರಿಣಾಮವಾಗಿ, ಪಾಕ್ ರಾಷ್ಟ್ರೀಯ ಟಿ20 ಚಾಂಪಿಯನ್‌ಶಿಪ್‌ನ ಪಂದ್ಯ ಶುಲ್ಕವನ್ನು ಶೇ.90ರಷ್ಟು, ಮೀಸಲು ಆಟಗಾರರ ಪಾವತಿಯನ್ನು ಶೇ.87.5ರಷ್ಟು ಕಡಿತಗೊಳಿಸಲು ಪಿಸಿಬಿ ನಿರ್ಧರಿಸಿದೆ. ಹಾಗೆಯೇ, ಆಟಗಾರರಿಗೆ ನೀಡುತ್ತಿದ್ದ ಫೈವ್ ಸ್ಟಾರ್ ವಸತಿ ಸೌಲಭ್ಯಗಳನ್ನು ಕಡಿತಗೊಳಿಸಿ ಎಕಾನಮಿ ಹೋಟೆಲ್‌ಗಳಿಗೆ ಬದಲಿಸಲಾಗಿದೆ.
