Jaipur: ರಕ್ಷಣಾತ್ಮಕ ಆಟದಲ್ಲಿ ತಮ್ಮ ಸಾಮರ್ಥ್ಯ ತೋರಿದ ಬೆಂಗಳೂರು ಬುಲ್ಸ್ ತಮ್ಮ ಎದುರಾಳಿ ಗುಜರಾತ್ ಜೈಂಟ್ಸ್ ವಿರುದ್ಧ 28-24 ಅಂಕಗಳಿಂದ ಗೆಲುವು ಸಾಧಿಸಿತು. ಈ ಜಯದಿಂದ ಬುಲ್ಸ್ ಈ ಆವೃತ್ತಿಯಲ್ಲಿ 5ನೇ ಬಾರಿ ಗೆಲುವು ದಾಖಲಿಸಿ ಅಂಕಪಟ್ಟಿಯಲ್ಲಿ 4ನೇ ಸ್ಥಾನಕ್ಕೆ ಏರಿತು.
ಬುಲ್ಸ್ ಮೊದಲ 3 ಪಂದ್ಯಗಳಲ್ಲಿ ಸೋಲು ಅನುಭವಿಸಿದ್ದರೂ, ನಂತರದ 4 ಪಂದ್ಯಗಳಲ್ಲಿ ಗೆಲುವು ಸಾಧಿಸಿದ್ದರು. ಕಳೆದ ಪಂದ್ಯದಲ್ಲಿ ಸೋಲು ಅನುಭವಿಸಿದ್ದರೂ, ಈ ಪಂದ್ಯದಲ್ಲಿ ಜಯ ಹಳಿಗೆ ಮರಳಿ ಬಂದಿದೆ. ಜೈಂಟ್ಸ್ 6ನೇ ಸೋಲಿಗೆ ಗುರಿಯಾಗಿ ಕೊನೆಯ ಸ್ಥಾನದಲ್ಲಿದ್ದಾರೆ. ಮೊದಲಾರ್ಧದಲ್ಲಿ ಬುಲ್ಸ್ 2 ಬಾರಿ ಆಲೌಟ್ ಆಗುವುದನ್ನು ತಪ್ಪಿಸಿಕೊಂಡು 20 ನಿಮಿಷದ ಆಟದ ಮುಕ್ತಾಯಕ್ಕೆ 17-13 ಅಂಕಗಳಿಂದ ಮುನ್ನಡೆ ಸಾಧಿಸಿತು. ದ್ವಿತೀಯಾರ್ಧದಲ್ಲೂ ಉತ್ತಮ ರಕ್ಷಣಾತ್ಮಕ ಪ್ರದರ್ಶನ ನೀಡಿದ ಬುಲ್ಸ್ 4 ಅಂಕಗಳ ಜಯ ಸಾಧಿಸಿತು.
ಬೆಂಗಳೂರು ಬುಲ್ಸ್ ಪರ ರೈಡರ್ ಆಕಾಶ್ ಶಿಂಧೆ 7 ಅಂಕ ಗಳಿಸಿದರೆ, ನಾಯಕ ಯೋಗೇಶ್ 6 ಟ್ಯಾಕಲ್ ಅಂಕ ಗಳಿಸಿದರು. ಬುಲ್ಸ್ ಮುಂದಿನ ಪಂದ್ಯವನ್ನು ಸೆಪ್ಟೆಂಬರ್ 25ರಂದು ಯು.ಪಿ. ಯೋಧಾಸ್ ವಿರುದ್ಧ ಆಡಲಿದೆ. ಸೋಮವಾರದ 2ನೇ ಪಂದ್ಯದಲ್ಲಿ ಯು.ಪಿ. ಯೋಧಾಸ್ ತಮಿಳ್ ತಲೈವಾಸ್ ವಿರುದ್ಧ 39-22 ಅಂಕಗಳಿಂದ ಗೆಲುವು ಸಾಧಿಸಿದರು.
