SSLC ವಿದ್ಯಾರ್ಥಿಗಳ ಜೀವನದಲ್ಲಿ ತುಂಬಾ ಮಹತ್ವದ ಹಂತವಾಗಿದೆ. ವೃತ್ತಿಜೀವನದ ಬುನಾದಿ ಈ ಹಂತದಲ್ಲಿ ಇಡಲಾಗುತ್ತದೆ. ಪರೀಕ್ಷೆಯಲ್ಲಿ ಉತ್ತಮ ಅಂಕಗಳನ್ನು ಪಡೆಯಲು ಸರಿಯಾದ ತಯಾರಿಯ ಅಗತ್ಯವಿದೆ. ನಾಳೆಯಿಂದ SSLC ಪರೀಕ್ಷೆಗಳು ಆರಂಭವಾಗುತ್ತಿರುವುದರಿಂದ, ಕೊನೆಯ ದಿನದ ಸಿದ್ಧತೆಯ ಬಗ್ಗೆ ಕೆಲವು ಮುಖ್ಯ ಸಲಹೆಗಳು.
ಕೊನೆಯ ಹಂತದ ತಯಾರಿ ಸಲಹೆಗಳು
- ಪರೀಕ್ಷೆಗೆ ಒಂದು ದಿನ ಬಾಕಿಯಿರುವಾಗಲೇ ಮೊದಲ ದಿನ ಯಾವ ವಿಷಯದ ಪರೀಕ್ಷೆ ಇದೆ ಎಂದು ಖಚಿತಪಡಿಸಿಕೊಳ್ಳಿ.
- ಓದಿದ ವಿಷಯಗಳ ಮುಖ್ಯ ಅಂಶಗಳನ್ನು ಕಿರುಟಿಪ್ಪಣಿ ಮಾಡಿಕೊಂಡಿದ್ದರೆ, ಒಮ್ಮೆ ಕಣ್ಣಾಯಿಸಿ ಮನನ ಮಾಡಿಕೊಳ್ಳಿ.
- ಆತ್ಮವಿಶ್ವಾಸ ಉಳಿಸಿಕೊಳ್ಳಿ—ಪರೀಕ್ಷೆ ಚೆನ್ನಾಗಿ ಬರೆಯುವೆ ಎಂದು ನಿಮ್ಮನ್ನು ನಂಬಿಕೊಳ್ಳಿ.
- ಪ್ರವೇಶ ಪತ್ರ ಹಾಗೂ ಲೇಖನ ಸಾಮಗ್ರಿಗಳನ್ನು ಬ್ಯಾಗ್‌ನಲ್ಲಿ ಸಿದ್ಧವಾಗಿಡಿ.
- ಆರೋಗ್ಯದ ಬಗ್ಗೆ ಕಾಳಜಿ ವಹಿಸಿ—ನಿದ್ರೆ ಕಡಿಮೆ ಮಾಡಬೇಡಿ, ಆರೋಗ್ಯಕರ ಆಹಾರ ಸೇವಿಸಿ.
- ರಾತ್ರಿ ಬೇಗ ಮಲಗಿ, ಬೆಳಗ್ಗೆ ತಾಜಾತನದಿಂದ ಎದ್ದು ಓದಿದ ವಿಷಯಗಳನ್ನು ಪುನರವಲೋಕನ ಮಾಡಿ.
ಪರೀಕ್ಷಾ ದಿನ ಪಾಲಿಸಬೇಕಾದ ಅಂಶಗಳು
- ಬೆಳಗ್ಗೆ ಬೇಗನೆ ಎದ್ದು, ಪರೀಕ್ಷೆಗೆ ಬೇಕಾದ ಎಲ್ಲ ಸಾಮಗ್ರಿಗಳನ್ನು ಒಮ್ಮೆ ಪರಿಶೀಲಿಸಿ.
- ಮನೆಯ ಹಿರಿಯರ ಆಶೀರ್ವಾದ ಪಡೆದು, ಪರೀಕ್ಷಾ ಕೇಂದ್ರಕ್ಕೆ ಸಮಯೋಚಿತವಾಗಿ ಹೋಗಿ.
- ಪರೀಕ್ಷಾ ಕೇಂದ್ರಕ್ಕೆ ಕನಿಷ್ಠ ಒಂದು ಗಂಟೆ ಮುಂಚಿತವಾಗಿ ತಲುಪುವುದು ಉತ್ತಮ.
- ಹಾಲ್ ಟಿಕೆಟ್ ಹಾಗೂ ಲಿಖಿತ ಸಾಮಗ್ರಿಗಳನ್ನು ಸರಿಯಾಗಿ ಹೊಂದಿಸಿ.
- ಉತ್ತರಪತ್ರಿಕೆ ಪಡೆದುಕೊಂಡ ಬಳಿಕ ನೋಂದಣಿ ಸಂಖ್ಯೆಯನ್ನು ಸರಿಯಾಗಿ ಬರೆಯಿರಿ.
- ಪ್ರಶ್ನೆ ಪತ್ರಿಕೆ ಪಡೆದ ನಂತರ ಮೊದಲು ಸಂಪೂರ್ಣ ಓದಿ, ಗೊತ್ತಿರುವ ಪ್ರಶ್ನೆಗಳಿಗೆ ಸ್ಪಷ್ಟ ಉತ್ತರ ಬರೆಯಿರಿ.
