Bengaluru: ತುಂಗಭದ್ರಾ ಅಣೆಕಟ್ಟೆಯ (Tungabhadra Dam) 33 ಗೇಟ್‌ಗಳನ್ನು ಬದಲಾಯಿಸಲು ಮಂಡಳಿ ಟೆಂಡರ್ ಕರೆದಿದೆ. ಗುತ್ತಿಗೆ ಅಹಮದಾಬಾದ್ ಕಂಪನಿಗೆ ನೀಡಲಾಗಿದೆ. ಈಗಾಗಲೇ ಆರು ಗೇಟ್‌ಗಳ ತಯಾರಿ ಕೆಲಸ ನಡೆಯುತ್ತಿದೆ ಎಂದು ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ವಿಧಾನಸಭೆಯಲ್ಲಿ ತಿಳಿಸಿದ್ದಾರೆ.
ಅಗತ್ಯವಾದ ಸಾಮಗ್ರಿ ಬರುತ್ತಿದೆ. ಗದಗ ಹಾಗೂ ಹೊಸಪೇಟೆಯಲ್ಲಿ ಗೇಟ್‌ಗಳ ತಯಾರಿ ನಡೆಯುತ್ತಿದೆ. ಜಿಂದಾಲ್ ಕಂಪನಿಯೂ ಸಹಕಾರ ನೀಡುತ್ತಿದೆ. ಆಂಧ್ರದ ಎಂಜಿನಿಯರ್‌ಗಳಿಗೆ ಕೆಲಸ ಬೇಗ ಮುಗಿಸಲು ಸೂಚನೆ ನೀಡಲಾಗಿದೆ. ಬೇರೆ ಕಂಪನಿಗಳಿಗೆ ಸಹ ಅವಕಾಶ ನೀಡಿ ಕೆಲಸ ವೇಗಗೊಳಿಸಲಾಗುತ್ತಿದೆ ಎಂದರು.
ಅಣೆಕಟ್ಟೆಯ ಸುರಕ್ಷತೆಗಾಗಿ ಕೇವಲ 80 ಟಿಎಂಸಿ ನೀರು ಮಾತ್ರ ಸಂಗ್ರಹಿಸಬೇಕು. ಆದ್ದರಿಂದ ಈ ವರ್ಷ ಎರಡನೇ ಬೆಳೆಗಾಗಿ ನೀರು ಬಿಡಲು ಸಾಧ್ಯವಿಲ್ಲ. ನೀರು ಬಿಡಿದರೆ ಗೇಟ್ ಅಳವಡಿಸುವುದು ಅಸಾಧ್ಯ. ರೈತರು ಚಿಂತೆಯಲ್ಲಿ ಇದ್ದಾರೆ. ಕುಡಿಯುವ ನೀರು ಹಾಗೂ ಕೈಗಾರಿಕೆಗಳಿಗೆ ಮಾತ್ರ ನೀರು ಬಿಡಲಾಗುತ್ತದೆ ಎಂದರು.
ದುರಸ್ತಿ ವೆಚ್ಚದಲ್ಲಿ ಕರ್ನಾಟಕವು 66% ಹೊಣೆ ಹೊತ್ತುಕೊಳ್ಳಬೇಕು, ಆಂಧ್ರ ಮತ್ತು ತೆಲಂಗಾಣವು 33% ನೀಡಬೇಕು. ಆದರೆ ಆಂಧ್ರ ಹಣ ಕೊಟ್ಟಿಲ್ಲ. ಅವರ ಪಾಲಿನ ಹಣವನ್ನೂ ನಾವು ಕೊಡಲು ಸಿದ್ಧರಾಗಿದ್ದೇವೆ. ರೈತರಿಗೆ ತೊಂದರೆಯಾಗಬಾರದು ಎಂಬ ಕಾರಣದಿಂದ ಕರ್ನಾಟಕವೇ ಹಣ ನೀಡಲು ಮುಂದಾಗಿದೆ ಎಂದರು.
ಅಣೆಕಟ್ಟಿನಲ್ಲಿ ಹೂಳಿನ ಕಾರಣದಿಂದ ಸಂಗ್ರಹ ಸಾಮರ್ಥ್ಯ 105 ಟಿಎಂಸಿಗೆ ಕುಸಿದಿದೆ. ಅದಕ್ಕಾಗಿ ನವಿಲೆ ಬಳಿ ಹೊಸ ಸಮತೋಲಿತ ಅಣೆಕಟ್ಟೆ ನಿರ್ಮಾಣಕ್ಕೆ 11 ಸಾವಿರ ಕೋಟಿ ರೂ. ಯೋಜನೆ ರೂಪಿಸಲಾಗಿದೆ. ಇದಕ್ಕೆ ಅನುಮೋದನೆಗಾಗಿ ಮಂಡಳಿಗೆ ಪ್ರಸ್ತಾಪ ಕಳುಹಿಸಲಾಗಿದೆ, ಆದರೆ ಪ್ರತಿಕ್ರಿಯೆ ಬಂದಿಲ್ಲ. ಆಂಧ್ರ ಮುಖ್ಯಮಂತ್ರಿಗಳೊಂದಿಗೆ ಮಾತನಾಡಲು ಮಾಡಿದ ಪ್ರಯತ್ನವೂ ವಿಫಲವಾಗಿದೆ ಎಂದರು.
ರಾಜ್ಯದ ಎಲ್ಲಾ ಅಣೆಕಟ್ಟುಗಳ ತಾಂತ್ರಿಕ ಸ್ಥಿತಿಯನ್ನು ಪರಿಶೀಲಿಸಿ ವರದಿ ಸಿದ್ಧಪಡಿಸಲಾಗಿದೆ. ಗೇಟ್‌ಗಳ ಆಯುಷ್ಯ ಸಾಮಾನ್ಯವಾಗಿ 50 ವರ್ಷ. ಕಳೆದ ವರ್ಷ 19ನೇ ಗೇಟ್ ಕಳಚಿಬಿದ್ದು ತೊಂದರೆಯಾಯಿತು, ಆದರೆ ತಕ್ಷಣ ತಾತ್ಕಾಲಿಕ ಗೇಟ್ ಅಳವಡಿಸಿ ಅನಾಹುತ ತಪ್ಪಿಸಲಾಯಿತು.
ಬಜಾಲ್ ಸಮಿತಿ ಎಲ್ಲಾ ಗೇಟ್‌ಗಳನ್ನು ತಕ್ಷಣ ಬದಲಾಯಿಸುವಂತೆ ಶಿಫಾರಸು ಮಾಡಿದೆ. ಎಲ್ಲಾ ಗೇಟ್‌ಗಳನ್ನು ಬದಲಿಸಲು ಕನಿಷ್ಠ 8 ತಿಂಗಳು ಬೇಕಾಗುತ್ತದೆ ಎಂದು ಉಪಮುಖ್ಯಮಂತ್ರಿ ಹೇಳಿದರು.
