Mumbai: ಇನ್ಫೋಸಿಸ್ ಸಂಸ್ಥಾಪಕ ಎನ್. ಆರ್. ನಾರಾಯಣಮೂರ್ತಿ (Narayana Murthy) ಅವರ 70 ಗಂಟೆ ಕೆಲಸದ ಸಲಹೆ ದೊಡ್ಡ ವಿವಾದಕ್ಕೆ ಕಾರಣವಾಗಿದೆ. ಈ ಕುರಿತು ಮೂಡಿದ ಆಕ್ಷೇಪಣೆಗಳ ನಡುವೆ ಅವರು ತಮ್ಮ ನಿಲುವಿನ ಬಗ್ಗೆ ಸ್ಪಷ್ಟನೆ ನೀಡಿದ್ದಾರೆ.
ಮುಂಬೈನ ಕಿಲಾಚಂದ್ ಮೆಮೋರಿಯಲ್ ಲೆಕ್ಚರ್‌ನಲ್ಲಿ ಮಾತನಾಡಿದ ಅವರು, ಯಾರೂ ಯಾರಿಗೂ ಬಲವಂತ ಮಾಡಬಾರದು ಎಂದು ಹೇಳಿದ್ದಾರೆ. “ನಾನು ಬೆಳಿಗ್ಗೆ 6:20ಕ್ಕೆ ಆಫೀಸ್ ಗೆ ಹೋಗಿ, ರಾತ್ರಿ 8:30ಕ್ಕೆ ವಾಪಾಸಾಗುತ್ತಿದ್ದೆ. ಇದು ನನ್ನ ವೈಯಕ್ತಿಕ ಆಯ್ಕೆಯಾಗಿತ್ತು. ಪ್ರತಿ ವ್ಯಕ್ತಿಯು ತನ್ನ ಕೆಲಸದ ಅವಧಿ ತಾನೇ ನಿರ್ಧರಿಸಿಕೊಳ್ಳಬೇಕು” ಎಂದು ಅವರು ಹೇಳಿದರು.
ನಾರಾಯಣಮೂರ್ತಿ ಅವರ ಮಾತುಗಳ ಪ್ರಕಾರ, “ಇದು ವ್ಯಕ್ತಿಯ ಆತ್ಮವಿಮರ್ಶೆಗೆ ಸಂಬಂಧಿಸಿದ ವಿಷಯ. ಪ್ರತಿಯೊಬ್ಬರೂ ತಮ್ಮ ಜೀವನ ಶೈಲಿಯ ಪ್ರಕಾರ ನಿರ್ಧಾರ ಮಾಡಬೇಕು.”
ನಾರಾಯಣಮೂರ್ತಿ ಈ ಹಿಂದೆ ಜಪಾನ್, ಜರ್ಮನಿ ಮುಂತಾದ ದೇಶಗಳ ಅಭಿವೃದ್ಧಿಯನ್ನು ಉದಾಹರಿಸಿ, ಯುವಕರು ವಾರಕ್ಕೆ 70 ಗಂಟೆ ಕೆಲಸ ಮಾಡಬೇಕು ಎಂದು ಸಲಹೆ ನೀಡಿದ್ದರು. ಈ ಹೇಳಿಕೆ ಸಾಮಾನ್ಯ ಜನರಲ್ಲಿ ಮತ್ತು ಉದ್ಯಮ ವಲಯದಲ್ಲಿ ಭಿನ್ನ ಅಭಿಪ್ರಾಯಗಳಿಗೆ ಕಾರಣವಾಯಿತು.
ಎಲ್ & ಟಿ ಛೇರ್ಮನ್ ಎಸ್.ಎನ್. ಸುಬ್ರಹ್ಮಣ್ಯನ್, ಇದಕ್ಕೆ ಮುಂದಾಗಿ, “ವಾರಕ್ಕೆ 90 ಗಂಟೆ ಕೆಲಸ ಮಾಡಬೇಕು” ಎಂದು ಹೇಳಿದ್ದು, ಸಾರ್ವಜನಿಕರ ಟ್ರೋಲ್‌ಗಳಿಗೆ ಗುರಿಯಾಗಿದ್ದಾರೆ.
ಈ ಎಲ್ಲಾ ವಿವಾದಗಳಿಗೆ ತೆರೆ ಎಳೆಯಲು, ನಾರಾಯಣಮೂರ್ತಿ ಅವರು ತಮ್ಮ ನಿಲುವು ಸ್ಪಷ್ಟಪಡಿಸಿರುವುದರಿಂದ, ಈ ಚರ್ಚೆಗಳು ಇದೀಗ ಶಮನಗೊಳ್ಳುವ ನಿರೀಕ್ಷೆ ಇದೆ.
