Delhi: ಮುಂಬರುವ ಹಣಕಾಸು ವರ್ಷ (2025-26)ದಲ್ಲಿ ಭಾರತೀಯ ರಿಸರ್ವ್ ಬ್ಯಾಂಕ್ (RBI-Reserve Bank of India) ಮೂರು ಬಾರಿ ಬಡ್ಡಿದರ ಕಡಿತಗೊಳಿಸಬಹುದು ಎಂದು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ರಿಸರ್ಚ್ ಇಕೋವ್ರ್ಯಾಪ್ ವರದಿ ತಿಳಿಸಿದೆ. ಒಟ್ಟು 75 ಮೂಲಾಂಕಗಳಷ್ಟು (ಬೇಸಿಸ್ ಪಾಯಿಂಟ್) ಬಡ್ಡಿದರ ಇಳಿಕೆಯಾಗುವ ಸಾಧ್ಯತೆ ಇದೆ.
ಈ ವರ್ಷದ ಏಪ್ರಿಲ್, ಜೂನ್ ಮತ್ತು ಅಕ್ಟೋಬರ್ ತಿಂಗಳಲ್ಲಿ ತಲಾ 25 ಬೇಸಿಸ್ ಪಾಯಿಂಟ್ ಗಳಷ್ಟು ಬಡ್ಡಿದರ ಕಡಿತಗೊಳಿಸಬಹುದೆಂದು ವರದಿಯಲ್ಲಿ ಅಂದಾಜಿಸಲಾಗಿದೆ. ಫೆಬ್ರವರಿ ತಿಂಗಳ ಹಣದುಬ್ಬರ ಶೇ. 3.61ಕ್ಕೆ ಇಳಿದಿರುವುದು ಮತ್ತು ಜನವರಿ-ಮಾರ್ಚ್ ಕ್ವಾರ್ಟರ್ ನಲ್ಲಿ ಶೇ. 3.9 ಹಣದುಬ್ಬರ ಇರಬಹುದಾದ ಕಾರಣ, ಎಪ್ರಿಲ್‌ನಲ್ಲಿ RBI ದರ ಕಡಿತಗೊಳಿಸಬಹುದು.
ಹಿಂದಿನ ಬಡ್ಡಿದರ ಇಳಿಕೆ ಮತ್ತು ಮುಂದಿನ ನಿರೀಕ್ಷೆಗಳು: RBI ಈ ಫೆಬ್ರವರಿಯಲ್ಲಿ 25 ಮೂಲಾಂಕಗಳಷ್ಟು ಬಡ್ಡಿದರ ಕಡಿತಗೊಳಿಸಿತ್ತು, ಶೇ. 6.50ರಿಂದ ಶೇ. 6.25ಕ್ಕೆ ಇಳಿಕೆಯಾಯಿತು. ಏಪ್ರಿಲ್, ಜೂನ್ ಮತ್ತು ಅಕ್ಟೋಬರ್ ತಿಂಗಳಲ್ಲಿ ದರ ಇಳಿಕೆ ಮಾಡಿದರೆ, ಈ ವರ್ಷದೊಳಗೆ ನಾಲ್ಕು ಬಾರಿ ಬಡ್ಡಿದರ ಕಡಿತಗೊಳ್ಳಬಹುದು. ಹಣದುಬ್ಬರ ನಿಯಂತ್ರಣದಲ್ಲಿರುವುದರಿಂದ RBI ರಿಪೋ ದರ ಇಳಿಸುವ ಅವಕಾಶ ಹೆಚ್ಚಿದೆ. ಇದರಿಂದ ಆರ್ಥಿಕತೆ ಇನ್ನಷ್ಟು ಬಲಪಡೆಯಬಹುದು.
ಹಣದುಬ್ಬರದ ಅಂದಾಜು: SBI ರಿಸರ್ಚ್ ಪ್ರಕಾರ, 2024-25ರಲ್ಲಿ ಹಣದುಬ್ಬರ ಶೇ. 4.7ರಷ್ಟಿರಬಹುದು. 2025-26ರಲ್ಲಿ ಹಣದುಬ್ಬರ ಶೇ. 4.0ರಿಂದ 4.2ರ ಒಳಗಿರಬಹುದು. ಈ ನಿರೀಕ್ಷೆಯ ಕಾರಣದಿಂದ RBI ಬಡ್ಡಿದರ ಕಡಿತಗೊಳಿಸಬಹುದು ಎಂದು ವರದಿ ಹೇಳುತ್ತದೆ.
ತರಕಾರಿ ಬೆಲೆ ಇಳಿಕೆ ಮತ್ತು ಇತರ ಅಂಶಗಳು: ಫೆಬ್ರವರಿ ತಿಂಗಳ ಹಣದುಬ್ಬರ ಶೇ. 3.61ಕ್ಕೆ ಇಳಿದಿದ್ದು, 20 ತಿಂಗಳಲ್ಲಿ ಮೊದಲು ತರಕಾರಿಯ ಬೆಲೆ ಇಳಿದಿದೆ. ಬೆಳ್ಳುಳ್ಳಿ, ಟೊಮೆಟೋ ಮತ್ತು ಆಲೂಗಡ್ಡೆ ಬೆಲೆಗಳು ಕಡಿಮೆಯಾಗಿದೆ. ಮಹಾಕುಂಭ ಮೇಳದ ಪರಿಣಾಮವಾಗಿ ಬೆಳ್ಳುಳ್ಳಿಯ ಬಳಕೆ ಕಡಿಮೆಯಾಗಿದೆ.
ಔದ್ಯಮಿಕ ಉತ್ಪಾದನೆ ಬೆಳವಣಿಗೆ: ಭಾರತದ ಔದ್ಯಮಿಕ ಉತ್ಪಾದನೆ ದರ (IIP) ಜನವರಿಯಲ್ಲಿ ಶೇ. 5ಕ್ಕೆ ತಲುಪಿದೆ. ಡಿಸೆಂಬರ್ನಲ್ಲಿ ಇದು ಶೇ. 3.2 ಇತ್ತು. ತಯಾರಿಕಾ ವಲಯ (ಮ್ಯಾನುಫ್ಯಾಕ್ಚರಿಂಗ್ ಸೆಕ್ಟರ್) ಶೇ. 5.5ರಷ್ಟು ಬೆಳವಣಿಗೆಯನ್ನು ಕಂಡಿದೆ. ಷೇರು ಮಾರುಕಟ್ಟೆಯಲ್ಲಿ ಲಿಸ್ಟ್ ಆಗಿರುವ 4,000 ಕಂಪನಿಗಳ ಆದಾಯವು ಮೂರನೇ ಕ್ವಾರ್ಟರ್ (ಅಕ್ಟೋಬರ್-ಡಿಸೆಂಬರ್)ದಲ್ಲಿ ಶೇ. 6.2ರಷ್ಟು ಹೆಚ್ಚಾಗಿದೆ.
