New Delhi: ಬಿಹಾರದಲ್ಲಿ ನಡೆಯುತ್ತಿರುವ ಮತದಾರರ ಪಟ್ಟಿಯ ವಿಶೇಷ ಪರಿಷ್ಕರಣೆ (SIR) ಕುರಿತಂತೆ ಉಂಟಾಗಿರುವ ವಿವಾದದ ಮಧ್ಯೆ, ಯಾವುದೇ ಅರ್ಹ ಮತದಾರನನ್ನು ಕಾರಣವಿಲ್ಲದೇ ಪಟ್ಟಿಯಿಂದ ಕೈಬಿಡಲಾಗುವುದಿಲ್ಲ ಎಂದು ಚುನಾವಣಾ ಆಯೋಗ (Election Commission) ಸ್ಪಷ್ಟಪಡಿಸಿದೆ.
SIR ಪ್ರಕ್ರಿಯೆಯಿಂದ ಕೋಟ್ಯಂತರ ಜನರು ಮತದಾನ ಹಕ್ಕು ಕಳೆದುಕೊಳ್ಳುವ ಸಾಧ್ಯತೆ ಇದೆ ಎಂಬ ಆಪಾದನೆಯೊಂದಿಗೆ ಪ್ರತಿಪಕ್ಷಗಳು ತೀವ್ರ ವಿರೋಧ ವ್ಯಕ್ತಪಡಿಸಿದ್ದವು.
ಆಯೋಗವು 10 ಗುರಿಗಳನ್ನು ಹೊಂದಿರುವ SIR ಪ್ರಕ್ರಿಯೆಯ ಉದ್ದೇಶ ಪಟ್ಟಿ ಮಾಡಿದೆ. ಯಾವುದೇ ಅರ್ಹ ನಾಗರಿಕನ ಮತದಾನ ಹಕ್ಕು ಹಿಂಪಡೆಯುವ ಉದ್ದೇಶ ಇಲ್ಲ ಎಂದು ಹೇಳಿದೆ.
- ಮೊದಲ ಗುರಿ: ಎಲ್ಲ ಮತದಾರರು ಹಾಗೂ ರಾಜಕೀಯ ಪಕ್ಷಗಳ ಚಟುವಟಿಕೆಯಲ್ಲಿ ಭಾಗವಹಿಸುವಿಕೆ.
- ಎರಡನೇ ಗುರಿ: ಬಿಹಾರದಲ್ಲಿ ಯಾವುದೇ ಅರ್ಹ ಮತದಾರನನ್ನು ಪಟ್ಟಿಯಿಂದ ಕೈಬಿಡದಿರುವುದು.
- ಮೂರನೇ ಗುರಿ: ತಾತ್ಕಾಲಿಕವಾಗಿ ಬಿಹಾರದಿಂದ ಬೇರೆಡೆಗೆ ತೆರಳಿದವರ ಹೆಸರನ್ನು ಕೂಡ ಕೈಬಿಡಬಾರದು.
- ಯುವ ಮತದಾರರು, ನಗರ ಮತದಾರರ ಹೆಸರು ಕೈಬಿಡಲಾಗದು ಎಂಬುದನ್ನು ಆಯೋಗ ಸ್ಪಷ್ಟಪಡಿಸಿದೆ.
- ಬೂತ್ ಮಟ್ಟದ ಅಧಿಕಾರಿಗಳ ಸಹಾಯದೊಂದಿಗೆ ಈ ಕಾರ್ಯವನ್ನು ಯಶಸ್ವಿಯಾಗಿ ನಡೆಸಲಾಗುತ್ತದೆ.
ತಾತ್ಕಾಲಿಕ ಹಂತ
- ಕರಡು ಮತದಾರರ ಪಟ್ಟಿ: ಆಗಸ್ಟ್ 1ರಂದು ಪ್ರಕಟ.
- ಅಂತಿಮ ಪಟ್ಟಿ: ಸೆಪ್ಟೆಂಬರ್ 30ರಂದು ಪ್ರಕಟ.
- ಆಕ್ಷೇಪಣೆ ಮತ್ತು ಹಕ್ಕು ಸಮಯ: ಆಗಸ್ಟ್ 1 ರಿಂದ ಸೆಪ್ಟೆಂಬರ್ 1 ರವರೆಗೆ.
- ಈ ಅವಧಿಯಲ್ಲಿ ತಪ್ಪಾಗಿ ಹತ್ತಿದ ಅಥವಾ ಕೈಬಿಡಲ್ಪಟ್ಟ ಮತದಾರರನ್ನು ಸೇರಿಸಲು ಅವಕಾಶ ಇರುತ್ತದೆ.
ಅಂಕಿಅಂಶಗಳ ಪ್ರಕಾರ
- 36 ಲಕ್ಷ ಮತದಾರರು ಬೇರೆ ವಿಳಾಸಕ್ಕೆ ಶಾಶ್ವತವಾಗಿ ಸ್ಥಳಾಂತರಗೊಂಡಿದ್ದಾರೆ.
- 7 ಲಕ್ಷ ಮಂದಿ ಎರಡು ಅಥವಾ ಹೆಚ್ಚು ಸ್ಥಳಗಳಲ್ಲಿ ಹೆಸರು ನೋಂದಾಯಿಸಿಕೊಂಡಿದ್ದಾರೆ.
- ಹೆಸರು ಸೇರ್ಪಡೆ ಮತ್ತು ಕೈಬಿಡುವಿಕೆಗೆ ಒಂದು ತಿಂಗಳ ಕಾಲಾವಕಾಶ ನೀಡಲಾಗಿದೆ. ಹಾಗಿದ್ದರೂ ಏಕೆ ಅನಗತ್ಯ ಗೊಂದಲ ಸೃಷ್ಟಿಸುತ್ತಿದ್ದಾರೆ ಎಂಬುದು ಅರ್ಥವಾಗುತ್ತಿಲ್ಲ ಎಂದು ಆಯೋಗ ಹೇಳಿದೆ.
ಈ ಬೃಹತ್ ಕಾರ್ಯವು ಯಾವುದೇ ತೊಂದರೆಯಿಲ್ಲದೆ ನಿರ್ವಹಿಸುವ ನಿಟ್ಟಿನಲ್ಲಿ ನಡೆಯುತ್ತಿದೆ. 7.89 ಕೋಟಿಗಿಂತಲೂ ಅಧಿಕ ಮತದಾರರ ಪೈಕಿ 7.24 ಕೋಟಿ ಮಂದಿ ಈಗಾಗಲೇ ತಮ್ಮ ಎಣಿಕೆ ನಮೂನೆಗಳನ್ನು ಸಲ್ಲಿಸಿದ್ದಾರೆ, ಇದು ಉತ್ತಮ ಪಾಲ್ಗೊಳ್ಳುವಿಕೆಯನ್ನು ತೋರಿಸುತ್ತದೆ ಎಂದು ಆಯೋಗ ಅಭಿಪ್ರಾಯಪಟ್ಟಿದೆ.
